Վարդան Այվազյանը կապ չի տեսնում չբացահայտված գործերի և միասնական քննչական մարմնի ստեղծման միջև
3 րոպեի ընթերցում
ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Ազգային ժողովի ՀՀԿ խմբակցության պատգամավոր Վարդան Այվազյանը կարևորում է միասնական քննչական մարմին ստեղծելու գաղափարը: Ազգային ժողովում լրագրողների հետ զրույցում Վարդան Այվազյանը նշեց, որ այդպիսով հնարավոր կլինի ապահովել քննչական մարմնի անկախությունը, ինչը շատ կարևոր նշաակություն ունի: «Շատ կարևոր է, որպեսզի մեզ մոտ քննչական մարմինն անկախ լինի և որևէ գերատեսչությունից կախում չունենա, ինչն էլ նախագծով առաջարկվում է»,- «Արմենպրես»-ի հաղորդմամբ՝ նշեց Այվազյանը:
Նա չհամաձայնեց դիտարկման հետ, թե միասնական քննչական մարմին ստեղծելու անհրաժեշտություն չկա, քանի որ երկրում բազմաթիվ չբացահայտված գործեր կան: «Չբացահայտված գործեր կան ոչ միայն Հայաստանում, այլ բոլոր երկրներում: Սակայն սա չի նշանակում, որ մենք չպետք է ստեղծենք այս մարմինը: Հենց այդպիսի գործերի առումով քննչական մարմինը կստանա իր գնահատականը հասարակության կողմից»,- ասաց նա:
Պատասխանելով հարցին, թե միասնական քննչական մարմնի նախագահ է նշանակվելու նախկին գլխավոր դատախազ Աղվան Հովսեփյանը, Այվազյանն ընդգծեց, որ պետք չէ համակարգի ստեղծումը կապել անձերի հետ: Նա նշեց, որ այս պահին չգիտի, թե ով է լինելու կառույցի նախագահը, քանի որ այն դեռևս չկա: «Միգուցե Աղվան Հովսեփյանին նշանակեն, միգուցե` չնշանակեն: Հնարավոր է նրան նշանակեն, իսկ 5 տարի հետո նա թոշակի գնա: Այս կառույցը մեկ անձի համար չի ստեղծվելու»,- նշեց պատգամավորը:
Ազգային ժողովը քննարկում է «Քննչական կոմիտեի մասին» օրենքի նախագիծը, որը կարգավորում է ՀՀ քննչական կոմիտեում ծառայության անցնելու կարգը, պաշտոնների ու կոչումների դասակարգումը, ծառայողների իրավունքները, պարտականությունները եւ պատասխանատվությունը, իրավական ու սոցիալական երաշխիքները եւ ծառայության հետ կապված մյուս հարաբերությունները: Ավելի վաղ, ՀՀ արդարադատության նախարար Հրայր Թովմասյանընշել է, որ օրենքի նախագծի ընդունման անհրաժեշտությունը պայմանավորված է քննչական մարմինների անկախությունն ամրապնդելու, քրեական գործերով նախաքննության արդյունավետությունը բարձրացնելու նպատակով: Նախագծի կարգավորման նպատակն է ամրապնդել քննչական մարմինների անկախությունը, բարձրացնել քրեական գործերով նախաքննության արդյունավետությունը եւ ՀՀ պաշտպանության նախարարության ու ՀՀ կառավարությանն առընթեր ՀՀ ոստիկանության կառուցվածքներում գործող քննչական մարմինների հենքի վրա կազմավորել միասնական քննչական մարմին: Նախագծի ընդունման արդյունքում կստեղծվի քննչական կոմիտե, կապահովվի նախաքննության մարմինների գործունեության սկզբունքների միասնականությունը, կերաշխավորվի քննչական մարմինների անկախությունը եւ դատավարական ինքնուրույնությունը, քննիչների կարգավիճակի միասնականությունը, նախաքննության առավել արդյունավետ իրականացումը: