Մայիսի երկրորդ կեսին տեղի կունենա ՀՀԿ 15-րդ համագումարը

ԵՐԵՎԱՆ, 28 ՓԵՏՐՎԱՐԻ, ԱՐՄԵՆՊՐԵՍ: Քիչ առաջ ավարտված ՀՀԿ Գերագույն մարմնի նիստի ժամանակ քննարկվել են ներկուսակցական խնդիրներ, ինչպես նաեւ մայիսի երկրորդ կեսին կայանալիք ՀՀԿ 15-րդ համագումարի նախապատրաստական աշխատանքները:

«Արմենպրես»-ի փոխանցմամբ` ՀՀ ԱԺ փոխնախագահ Էդուարդ Շարմազանովը նիստի ավարտից հետո տեղեկացրեց, որ մարտ-ապրիլին նախատեսվում է միջազգային տնտեսական համաժողով, որին մասնակցելու են նաև կուսակցության գործընկերները Ռուսատանից, Եվրոպայից և Չինաստանից: «Բացի տնտեսական համաժողովից, նիստի ժամանակ քննարկվել է նաև համագումարին մասնակից պատվիրակների ցանկը»,- ասաց Շարմազանովը` հավելելով, որ համագումարը նախապատրաստական աշխատանքների փուլում է և այլ նորություններ հայտնի չեն:

Հայաստանի Հանրապետական կուսակցությունը (ՀՀԿ, հիմնադրվել է 1990թ.) հայաստանյան քաղաքական դաշտում գործող եզակի կազմակերպություններից է, որն ունի տասնամյակների գաղափարական եւ քաղաքական արմատներ: ՀՀԿ-ն որպես իր գաղափարախոսության հիմք՝ ընդունել է Գարեգին Նժդեհի ուսմունքը, իսկ 1967-1987թթ. ընդհատակում գործած Ազգային Միացյալ կուսակցության մի շարք ակտիվ անդամներ առ այսօր էլ շարունակում են իրենց ուրույն գործունեությունը ՀՀԿ շարքերում եւ ղեկավար կազմում: ՀՀԿ-ն գաղափարական-քաղաքական ժառանգորդն է «Ցեղակրոն Ուխտերի» եւ «Ազգային Միացյալ կուսակցության», որոնք հայության համար ճակատագրական օրերին Սփյուռքում եւ Հայրենիքում հանդիսացան հայրենատիրության եւ անկախության գաղափարների ջահակիրները: ՀՀԿ ծնունդն օրգանապես կապված է 1988թ. ազգային զարթոնքի, անկախության համար մղվող պայքարի եւ Արցախյան ազատամարտի հետ: Ազատամարտի սկզբում կազմավորված «Անկախության Բանակ» ռազմաքաղաքական միավորումը կազմակերպական հենք հանդիսացավ ՀՀԿ հիմնադրման եւ ձեւավորման համար: Կուսակցության մշտական գործող ղեկավար մարմինը կուսակցության Գործադիր մարմինն է, որն ընտրվում է կուսակցության համագումարում` երկու տարի ժամկետով:

Կուսակցության գործադիր մարմնի նիստերը հրավիրվում են ոչ պակաս, քան ամիսը մեկ անգամ: Կուսակցության նախագահի կամ գործադիր մարմնի անդամների առնվազն 1/3-ի նախաձեռնությամբ կարող է հրավիրել արտահերթ նիստ: Նիստն օրինական է, եթե ներկա է գործադիր մարմնի անդամների առնվազն 2/3-ը: