1 րոպեի ընթերցում
ԵՐԵՎԱՆ, 24 ՓԵՏՐՎԱՐԻ, ԱՐՄԵՆՊՐԵՍ: Հայաստանը նվազեցրել է կահույքի ներմուծումը, ավելացրել՝ արտահանումը: Նախորդ տարի, 2012 թվականի համեմատ, Հայաստան ներկրվող կահույքի և դրա մասերի ծավալը նվազել է 19.7 տոկոսով և դարձել 57 հազար հատ, իսկ արտահանվածինն աճել է 440 տոկոսով կամ 5.4 անգամ և կազմել 8.1 հազար հատ: ՀՀ կառավարությանն առընթեր Պետական եկամուտների կոմիտեի տվյալներով՝ նախորդ տարի Հայաստան ներկրված կահույքի և դրա մասերի մաքսային ընդհանուր արժեքը գերազանցել է 19 միլիոն դոլարը, իսկ արտահանվածինը՝ 466 հազար դոլարը: «Արմենպրես»-ի հաղորդմամբ, անցյալ տարի մեր երկրից արտահանված կահույքի մեծ մասը գնել է Միացյալ Թագավորությունը (5.7 հազար հատ) և Վրաստանը (1.5 հազար հատ): Նախորդ տարի Հայաստան կահույք է ներկրվել հիմնականում Չինաստանից (32.5 հազար հատ), Պարագվայից (5.5 հազար հատ), Թուրքիայից (4.7 հզր հատ), Իտալիայից (3.7 հզր հատ) և այլն:
2012 թվականին Հայաստան է ներմուծվել 71 հազար հատ կահույք և դրանց մասեր և արտահանվել՝ 1.5 հազար հատ:
Նախորդ տարի Հայաստանում արտադրվել է ավելի քան 3.2 միլիարդ դրամի կահույք, ինչը 4.2 տոկոսով գերազանցել է 2012 թվականի ցուցանիշը: