1 րոպեի ընթերցում
ԵՐԵՎԱՆ, 13 ՓԵՏՐՎԱՐԻ, ԱՐՄԵՆՊՐԵՍ: Շարքային զինծառայող Արշակ Զարդարյանի մահվան պատճառը սուր թոքաբորբն է, որ կայծակնային արագությամբ խորացել է եւ բժիշկները չեն կարողացել փրկել 19-ամյա երիտասարդի կյանքը:«Արմենպրես»-ի հետ զրույցում «Մուրացան» հոսպիտալի պետ Արամ Ասատուրյանն ասաց, որ հիվանդության արագ զարգացման հետեւանքով ամբողջությամբ վնասվել էին նրա երիկամները: Ասատուրյանի հավաստիացմամբ, հոսպիտալում թոքաբորբի կամ այլ հիվանդության ախտանիշով նման ծանր դեպքեր չկան:
ՊՆ քննչական ծառայության ավագ սպա Մերի Սարգսյանն էլ «Արմենպրես»-ին տեղեկացրեց, որ դեպքի առթիվ հարուցվել է գործ` Քրեական օրենսգրքի 376-րդ հոդվածի 2-րդ մասի՝ անփույթ վերաբերմունքը ծառայության նկատմամբ, եթե անզգուշությամբ առաջացրել է ծանր հետեւանքներ հատկանիշներով:
Արշակ Զարդարյանը մահացել է փետրվարի 12-ին, զորակոչվել էր բանակ 2013 թ. գարնանը: