2 րոպեի ընթերցում
ԵՐԵՎԱՆ, 3 ՓԵՏՐՎԱՐԻ, ԱՐՄԵՆՊՐԵՍ: «Եվրատեսիլ 2014» երգի միջազգային մրցույթի հայաստանյան մասնակից Արամ Mp3-ն անակնկալ կատարում է նվիրել «Եվրատեսիլ 2013»-ի հաղթող ճանաչված, Դանիայի ներկայացուցիչ Էմիլի դե Ֆորեսթին: «Եվրատեսիլ»-ում այս տարվա մեր դեսպանը պատրաստել է մրցույթի անցած տարվա հաղթող«Only Teardrops»երգի cover տարբերակը՝ իր ոճով ու պատկերացմամբ, հայկական երաժշտական գործիքների հնչյուններով համեմված: Ինչպես «Արմենպրես»-ին տեղակացրին Առաջին ալիքի Հասարակայնության հետ կապերի բաժնից` Արամի մեկնաբանությամբ «Only Teardrops» երգի համացանցային պրեմիերան տեղի ունեցավ այսօր՝ փետրվարի 3-ին, կատարողի Youtube-յան պաշտոնական էջում: Երգը Արամը կատարել է օրերս Երևանում կայացած ակումբային համերգի ժամանակ:
«Եվրատեսիլ 2014» 59-րդ ամենամյա մրցույթը տեղի կունենա Դանիայի մայրաքաղաք Կոպենհագենի B&W Hallerne սրահում:Մրցույթը հյուրընկալող քաղաքում հունվարի 20-ին տեղի է ունեցել կիսաեզրափակիչ փուլերի տեղաբաշխման վիճակահանությունը, որի ժամանակ որոշվել են մասնակից երկրների ելույթների օրերը: Հայաստանի պատվիրակ Արամ Mp3-ն ելույթ կունենա մայիսի 6-ին՝ 1-ին կիսաեզրափակիչ փուլի համերգային 1-ին հատվածում: