ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ: Յուրաքանչյուր տարի ողջ աշխարհում ճանապարհատրանսպորտային պատահարների հետևանքով մահանում է 1 մլն 171 հազար մարդ, մոտ 40 մլն մարդ տարբեր տիպի վնասվածք է ստանում, ավելի քան 8 մլն-ը երկար ժամանակով զրկվում է աշխատունակությունից: Համաձայն վիճակագրական տվյալների` մահվան ելքով ՃՏՊ-ների մեծ մասը գրանցվել է ցածր և միջին եկամուտ ունեցող երկրներում, որտեղ տրանսպորտային միջոցների թվի անհամեմատ աճ է գրանցվել: Մահացու պատահարների գերակշիռ մասը գրանցվել է 15-29 տարեկան անձանց մասնակցությամբ, մինչդեռ դժբախտ պատահարների հիմնական պատճառները մնում են անփոփոխ` արագության սահմանափակման գերազանցումը, անսթափ վիճակում մեքենա վարելը, ավտոմեքենան վարելու ժամանակ ամրագոտի չկապելը: «Արմենպրես»-ի փոխանցմամբ, վերոնշյալ վիճակագրությունը ներկայացրել է ՀՀ ճանապարհային ոստիկանության պետ Արսեն Արշակյանը` հավելելով, որ թեև մեքենա վարելիս բացարձակ ապահովություն ակնկալել գրեթե անհնար է, սակայն, կարող ենք ինքներս նպաստել մեր ապահովությանը` հնազանդվելով երթևեկության կանոններին: Ճանապարհատրանսպորտային պատահարների առումով հայաստանյան վիճակագրությունն էլ մխիթարիչ չէ: Այս տարի արձանագրվել է 832 ճանապարհային պատահար, որոնց հետևանքով զոհվել է 43, վիրավորվել 1044 քաղաքացի: Համեմատությամբ նախորդ տարվա ութ ամիսների` այս տարի Երևան քաղաքում ճանապարհատրանսպորտային պատահարներից մահվան ելքով դեպքերի թիվը աճել է յոթով: Միաժամանակ ավելացել են ՃՏՊ-ների ոչ մահվան ելքով դեպքերը: Դրանք ավելացել են 128-ով, ինչի հետևանքով տարբեր աստիճանի մարմնական վնասվածք է ստացել 164 քաղաքացի:Ոստիկանությունում դա պայմանավորում են վերջին ամիսներին Հայաստան ներմուծված 17-18 հազար տրանսպորտային միջոցներով, որոնց 70 տոկոսն արտասահմանյան մակնիշի է (ոչ ռուսական արտադրության): Դրանք զինված են հզոր շարժիչներով: