ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ:Դեկտեմբերի 7-ի կեսգիշերն անց երկու ավտոմեքենաներ այրվել են մայրաքաղաքի տարբեր հատվածներում: Անհրաժեշտ է եղել փրկարարների աջակցությունը: Այս մասին «Արմենպրես»-ը տեղեկացավ ՀՀ արտակարգ իրավիճակների նախարարության պաշտոնական կայքից:
Դեպքերից մեկն արձանագրվել է ժամը 00.42-ին, Երևանի Մյասնիկյան պողոտայում` Կենդանաբանական այգու մոտակայքում: Դեպքի վայր է մեկնել մեկ մարտական հաշվարկ: Հրդեհը մարվել է ժամը 00.51-ին: Այրվել են «Սուիթ Ուեյ» տաքսի ծառայությանը պատկանող «Սամանդ» մակնիշի S5363 պետհամարանիշով ավտոմեքենայի (վարորդ` Ս. Թ.) շարժիչի հատվածն ու խցիկն` ամբողջությամբ:
Մյուս հրդեհն առաջացել է մեքենաների բախման արդյունքում: Դեկտեմբերի 7-ին, ժամը 03.16-ին, տեղեկություն է ստացվել, որ Երևանի Մոսկովյան փողոցի թիվ 1 հասցեի մոտակայքում այրվում է ավտոմեքենա: Դեպքի վայր է մեկնել մեկ մարտական հաշվարկ: Պարզվել է, որ բախվել են «Հյունդայի» մակնիշի (վարորդ՝ Ս. Ա., ծնվ. 1988թ.) և «Լադա 015» մակնիշի 11LS740 պետհամարանիշով (վարորդ՝ Մ. Բ.) ավտոմեքենաները, ինչից «Լադա» մակնիշի ավտոմեքենան ամբողջությամբ այրվել է: Հրդեհը մարվել է ժամը 03.31-ին:
Մինչ հրշեջ-փրկարարների կանչի վայր հասնելը ավտոմեքենաների վարորդները տարբեր աստիճանի մարմնական վնասվածքներով հոսպիտալացվել են «Սրբ. Գր. Լուսավորիչ» ԲԿ: Բժիշկները տուժածների առողջական վիճակը գնահատել են բավարար: