Ավտոպատահարների հետևանքով մարդիկ են զոհվել և վիրավորվել

ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետությունում դեկտեմբերի 6-ին և 7-ին տեղի ունեցած մի քանի ավտովթարների հետևանքով կան զոհեր և վիրավորներ:

Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապերի և լրատվության վարչությունից, դեկտեմբերի 6-ին, ժամը 09:40-ի սահմաններում, «Օպել Վեկտրա» մակնիշի ավտոմեքենան Երևան-Եղեգնաձոր ճանապարհի 65-րդ կմ-ին` Երասխավան գյուղի օղակաձև շրջադարձի մոտ, կողաշրջվել է: Վթարի հետևանքով ուղևոր, 1991թ. ծնված Ջիվան Նիկոլյանը տեղում մահացել է, իսկ վարորդը և 3 ուղևորները մարմնական վնասվածքներով տեղափոխվել են հիվանդանոց: Ոստիկանները պարզել են, որ ավտոմեքենայում է եղել նաև մեկ այլ ուղևոր, որը մարմնական վնասվածքով բուժօգնության է դիմել «Քանաքեռ-Զեյթուն» բժշկական կենտրոն: Կատարվում է քննություն:

Դեկտեմբերի 6-ին, ժամը 15.30-ի սահմաններում, «Կիա» մակնիշի ավտոմեքենան Երևանի Քաջազնունու և Վրացյան փողոցների խաչմերուկում վրաերթի է ենթարկել 1923թ. ծնված Ոստանիկ Դ.-ին, որը մարմնական վնասվածքներով տեղափոխվել է «Էրեբունի» բժշկական կենտրոն:Կատարվում է քննություն:

Դեկտեմբերի 7-ին՝ ժամը 00.45-ին, ոստիկանության Նոր Նորքի բաժնում հաղորդում է ստացվել, որ Նոր Նորքի զանգված տանող ճանապարհին` ռեստորանի մոտ, տաքսի ավտոմեքենա է այրվում: Ոստիկանները պարզել են, որ «Սամանդ» մակնիշի տաքսի ավտոմեքենայի վարորդ Սեյրան Թ.-ն ժամը 00.15-ի սահմաններում Մյասնիկյան պողոտայով ընթանալու ժամանակ նկատելով, որ մեքենայի առջևի մասում հրդեհ է առաջացել` արագ դուրս է եկել մեքենայից, որը հրդեհի հետևանքով ամբողջությամբ այրվել է: Հրդեհը մարվել է նույն օրը, ժամը 01.20-ին, 1 մարտական հաշվարկի կողմից: Հրդեհի առաջացման պատճառը և պատճառված նյութական վնասի չափը պարզվում են: Կատարվում է հետաքննություն: