ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: Դերասան Վարդան Պետրոսյանի փաստաբան Նիկոլայ Բաղդասարյանը պաշտպանյալին ձերբակալելու որոշման դեմ բողոք է ներկայացրել: Ինչպես «Արմենպրես»-ի հետ զրույցում նշեց փաստաբանն, կասկածյալ անձին ձերբակալելու որոշում կարելի է կայացնել միայն այն դեպքում, երբ նրա գտնվելու վայրը հայտնի չէ կամ նա գտնվում է այլ տեղանքում. սա օրենքի տառացի պահանջն է: «Վարդան Պետրոսյանի դեպքում երկու պահանջներն էլ առկա չեն: Այսինքն` և' հայտնի էր դերասանի գտնվելու վայրը, և նա չէր գտնվում այլ տեղանքում: Եթե օրենքի այդ երկու պահանջներն առկա չեն, ապա անձին ձերբակալելն անօրինական է»,- ասաց Նիկոլայ Բաղդասարյանը:
Նա տեղեկացրեց, որ նախաքննական մարմինն անհասկանալի շտապողականություն է դրսևորել: Առանց Վարդան Պետրոսյանին հարցաքննելուև ելակետային տվյալներ ձեռք բերելու` նշանակել է փորձաքննություն: «Մեզ մնում է հասկանալ, թե ինչպես և ինչի հիման վրա է որոշում է կայացվել: Պետք է տրամադրեն փորձաքննության մասին որոշման օրինակը, որպեսզի մենք հասկանանք, թե ինչի մասին է խոսքը»,- նշեց Բաղդասարյանը` հավելելով, որ Վարդան Պետրոսյանը խնդրել է իրեն 7 օր ժամանակ տալ, որպեսզի փոքր-ինչ կազդուրվի, սակայն քննիչը փորձեց այլ ճանապարհով գնալ:
Այս պահին դերասանի առողջական վիճակն անփոփոխ է. նա ծանր կայուն վիճակում է: Պաշտպանի դիտարկմամբ` ծանր վիրահատություն տանելուց հետո, դեպքերի պատճառով դերասանը սթրեսային վիճակում է, ինչի ազդեցության տակ առողջական վիճակն ավելի է վատացել: «Քանի որ ֆիզիկապես հնարավոր չի նրան տեղաշարժել, հետևաբար ոստիկաններն են հսկում նրա հիվանդասենյակը. նա որպես կասկածյալ ձերբակալված է»,- ասաց փաստաբանը:
Հոկտեմբերի 20-ին` ժամը 22:22-ին, Եղվարդ-Երևան ավտոճանապարհին` կամրջի մոտ, տեղի էր ունեցել ավտոպատահար: Դեռևս չբացահայտված հանգամանքներում Եղվարդ-Երևան ավտոճանապարհի 2-րդ կմ-ին բախվել են «ՎԱԶ-2121» և «ԲՄՎ» մակնիշի ավտոմեքենաները: Մահացել են Էդգար եւ Էդուարդ Հակոբյանները: Հրշեջ-փրկարարները «ԲՄՎ» մակնիշի ավտոմեքենայից դուրս էին բերել վարորդին`1959թ. ծնված Վարդան Պետրոսյանին: Վթարի ենթարկված Տաթեւ Հակոբյանը դեռեւս հիվանդանոցում է:Դեպքի առթիվ հարուցվել է քրեական գործ` ՀՀ քրեական օրենսագրքի 242 հոդվածի 3-րդ մասի հատկանիշներով: Նախաքննական մարմինը Վարդան Պետրոսյանին ձերբակալելու որոշում է կայացրել: