«Մանկական Եվրատեսիլ- 2013» երգի մրցույթն այս տարի կներկայանա մի շարք փոփոխություններով

ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: «Մանկական Եվրատեսիլ- 2013» երգի մրցույթը նոր անակնկալներ է պատրաստում աշխարհի տարբեր անկյուններում բնակվող հանդիսատեսների համար: «Արմենպրես»-ին Առաջին ալիքի հասարակայնության հետ կապերի բաժնից տեղեկացրին, որ այս տարի մրցույթի անցկացման կարգում մի շարք փոփոխություններ եւ նորամուծություններ են կատարվել: Ներկայացվող երգերի թույլատրելի առավելագույն տևողությունը 3 րոպե է: Միավորներ հայտնող պատանիները քվեարկության արդյունքները կհայտարարեն ոչ թե տեսանյութի միջոցով, այլ հենց համերգի բեմից: Այս տարի նախորդ մեկի փոխարեն կլինի 3 մրցանակային տեղ: Նրանք կպարգևատրվեն Փազլմեն գավաթներով, իսկ առաջին տեղը զբաղեցրած մասնակիցը հնարավորություն կստանա մասնակցել Եվրատեսիլ 2014-ին:

Մրցույթը այս տարի կանցկացվի Ուկրաինայի Արվեստների ազգային պալատում նոյեմբերի 30-ին՝ Be Creative նշանաբանի ներքո: «Մանկական Եվրատեսիլ- 2013» տարբերանշանը Puzzle Man է: Փազլ հավաքում են աշխարհի բոլոր երեխաները, որը զարգացնում է երեխայի ստեղծագործական միտքը և խորհրդանշում է տարբեր մասնիկներից բաղկացած միասնություն: Եվրոպայի տարբեր ծայրերից հավաքված երեխաները կհամախմբվեն մեկ գաղափարի շուրջ «Եղի′ր ստեղծագործ»:

«Մեր կարծիքով` Be Creative նշանաբանը շատ համահունչ է Puzzle Man տարբերանշանի հետ: Մեր աշխատանքային թիմը ոգեշնչվել է այս թեմայով եւ օգտագործել այս կոնցեպտը բեմի ձևավորման մեջ. այն գլուխկոտրուկ կհիշեցնի: Ժամանակակից տեխնոլոգիաները կօգնեն մեզ հեքիաթային մթնոլորտ ստեղծել եւ կենդանություն տալ հիմնական կոնցեպտին»,- նշել է Ուկրաինայի ազգային հեռուստաընկերության գործադիր տնօրեն Ալեքսանդր Պանտելեյմոնովը:

Մրցույթի հատուկ հյուրը կլինի «Մանկական Եվրատեսիլ-2012»-ի հաղթող Անաստասիա Պետրիկը: Մասնակիցների ելույթների հերթականությունը կորոշվի մրցույթի բացմանը նվիրված պաշտոնական խնջույքի ժամանակ, որը կանցկացվի նոյեմբերի 25-ին:

Այս տարի մասնակիցների ելույթից առաջ ցուցադրվող հեռուստաբացիկի տևողությունը կլինի 50 վայրկյան՝ նախորդ 40-ի փոխարեն:

Մրցույթը կվարեն Եվրատեսիլ-2013-ի մասնակից Զլատա Օգնևիչը և հաղորդավար Տիմուր Միրոշնիչենկոն:

Հայաստանը երաժշտական այս տոնին ներկացանելու է 15-ամյա Մոնիկա Ավանեսյանը` իր «Շոկո ֆաբրիկա» երգով: Մրցույթին մասնակում է 12 երկիր` Հայաստանը, Բելառուսը, Վրաստանը, Մոլդովան, Մակեդոնիան, Մալթան, Նիդերլանդները, Ռուսաստանը, Սան Մարինոն, Շվեդիան, Ուկրաինան, Ադրբեջանը:

Մեր երկիրրը Եվրոպայի հեղինակավոր պատանեկան այս մրցույթին ներկայանում է 7-րդ անգամ: