Եվրոպան պետք է ըմբռնումով վերաբերվի Հայաստանի ընտրությանը. Լեւոն Շիրինյան

ԵՐԵՎԱՆ, 5 ՍԵՊՏԵՄԲԵՐԻ ԱՐՄԵՆՊՐԵՍ: Հայաստանի Հանրապետության միանալը Մաքսային միությանը մեծապես պայմանավորված է աշխարհագրական գործոնով: Այդ մասին սեպտեմբերի 5-ին հրավիրված ասուլիսին ասաց քաղաքագետ Լեւոն Շիրինյանը: «Այս որոշումը 80 տոկոսով կարող ենք հաշվել որպես աշխարհագրական գործոնի թելադրանք, մնացածը կարող եք սուբյեկտիվ ցանկություններով պայմանավորել»,- «Արմենպրես»-ի հաղորդմամբ՝ ասաց Շիրինյանը: Քաղաքագետի դիտարկմամբ՝ Ռուսաստանը ուժային կենտրոն է դառնում:

Շիրինյանը հարց հղեց, թե արդյոք Եվրոպական կառույցներն ու Միացյալ Նահանգները 20 տարվա ընթացքում Հայաստանին տվել են թուրքական ներխուժման դեմ անվտանգության երաշխիք: Քաղաքագետը հիշեցրեց Գաբալայում Թուրքիայի նախագահի պանթուրքիստական հայտարարությունները եւ եվրոպական մամուլում այդ մասին արձագանքների բացակայությունը: «Անվտանգության երաշխիք Հայաստանի Հանրապետությանը որեւէ մեկը չի տվել»,- ասաց Շիրինյանը:

Քաղաքագետի դիտարկմամբ՝ Մաքսային միությանն անդամակցելով Ղազախստանի եւ Բելառուսի ինքնիշխանությունը այլ պետությունների համեմատ չի նվազել: Շիրինյանն ասաց, որ Հայաստան պետության կայացումը բացառապես կախված է հայերից, իսկ Եվրոպան պետք է ըմբռնումով վերաբերվի Հայաստանի ընտրությանը:

Սեպտեմբերի 3-ին Մոսկվայում Հայաստանի Հանրապետության Նախագահ Սերժ Սարգսյանը հայտարարել է Մաքսային միությանը միանալու վերաբերյալ Հայաստանի Հանրապետության որոշման և այդ նպատակով անհրաժեշտ կատարելիք քայլերը ձեռնարկելու մասին, իսկ հետագայում՝ Եվրասիական տնտեսական միության ձևավորմանը մասնակցելու վերաբերյալ: Միաժամանակ, ՀՀ նախագահը նշել է, որ Մաքսային միությանը միանալու որոշումը եվրոպական կառույցների հետ երկխոսությունից հրաժարում չէ: Իսկ ՀՀ Նախագահի աշխատակազմի ղեկավար Վիգեն Սարգսյանն էլ իր հերթին սեպտեմբերի 4-ին հայտարարել է, որ Ասոցացման համաձայնագրի նախաստորագրումը մնում է Հայաստանի օրակարգում: