3 րոպեի ընթերցում
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: Երիտասարդ կատարողների «Նոր ալիք 2013»-ի երեք մրցութային փուլերի արդյունքում առաջատարը Կուբայի ներկայացուցիչ Ռոբերտո Կել Տորեսն է (Roberto Kel Torres)-ը, ով ժյուրիի քվեարկության ձայների արդյունքում հավաքեց 357 միավոր:
«Արմենպրես»-ի փոխանցմամբ`երկրորդ տեղում է 356 միավոր հավաքած Վրաստանի պատվիրակ Սալոմե Կատամաձեն, երրորդում` Վիետնամից Vinh Khuat-ը, ով ընդամենը երկու միավորով է զիջում Կատամաձեին:
Երրորդ եւ վերջին «Պրեմիերաների օր» մրցութային ծրագրում մասնակիցները ներկայացրին նոր` նախկինում երբեւէ չհնչած ստեղծագործություններ:
Մրցույթում Հայաստանը ներկայացնող Մերի Մնջոյանը ներկայացրեց երաժշտության հեղինակ Հայկոյի եւ խոսքերի հեղինակ Ռուբեն Մխիթարյանի`իր համար գրված «Ես ու միայն դու» երգը` հավաքելով 344 միավոր եւ զբաղեցնելով 7-րդ հորիզոնականը:
Երգի պրեմիերաներով հանդես եկան ոչ միայն մասնակիցները, այլեւ Իոսիֆ Կոբզոնը, Իվան Դորնը, Գրիգորի Լեպսը, Անի Լորակը, Անժելիկա Վառումը, ռուսական էստրադայի այլ անվանի ներկայացուցիչներ: Երեկոյի հատուկ հյուրն էր Լարա Ֆաբիանը:
Հուլիսի 28-ի երեկոյան «Արմենիա» հեռուստաընկերության եթերում հեռուստադիտողները հնարավորություն կունենան դիտել «Նոր ալիք 2013»-ի փակման եւ մրցանակների հանձնման հանդիսավոր արարողությունը:
Այս տարի մրցույթի մրցանակային ֆոնդը կազմում է 100 հազար եվրո: Առաջին, երկրորդ եւ երրորդ տեղերը զբաղեցրած մասնակիցներին կտրվի «Ճենապակյա ալիք» մրցանակը, իսկ հանդիսատեսի համակրանք մրցանակին արժանացողին բաժին կհասնի «Twelve Thirteen» ոսկերչական ընկերության կողմից պատրաստված մրցանակը:
Որպես հատուկ հյուր կայանալիք համերգին հանդես կգան ԱլեսանդրոՍաֆինան եւ Էմմա Չապլինը:
2013 թվականին լրանում է մրցույթի 12-ամյակը: Ժյուրիի կազմում ընդգրկված էին Վալերի Մելաձեն, Կոնստանտին Մելաձեն, Վալերիան, Յուրի Անտոնովը, Տոտո Կուտունյոն, Մաքսիմ Ֆադեեւը, Լայմա Վայկուլեն, Լեոնիդ Ագուտինը, Իգոր Նիկալաեւը, Իգոր Մատվիենկոն եւ Իգոր Կրուտոյը: «Նոր ալիք 2013»-ը հաղթելու համար պայքարում էր 12 երկրի 16 ներկայացուցիչ: