Ամփոփվել են «Սլավոնական բազար 2013»-ի մրցութային առաջին օրվա արդյունքները

ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: Վիտեբսկում հուլիսի 11-ին մեկնարկած «Սլավյանսկի բազար 2013» 22-րդ էստրադային երգի փառատոնը հուլիսի 14-ին ամփոփել է մրցութային առաջին օրվա արդյունքները: Ինչպես հաղորդում է «Արմենպրես»-ը` վկայակոչելով ուկրաինական լրատվամիջոցները, առաջատար դիրքում է մրցույթում Բելառուսը ներկայացնղ Ալեքսանդր Սոլովյովը: Մրցույթում Հայաստանը ներկայացնում է «X ֆակտոր» հեռուստատեսային նախագծի հաղթող Վրեժ Կիրակոսյանը, ով առաջին մրցութային օրվա տվյալների համաձայն դեռեւս 13-րդ տեղում է:Մրցութային առաջին օրը նա ներկայացրել է լեհ հեղինակ Չեսլավ Նեմենի «Этот странный мир» ստեղծագործությունը, իսկ մրցութային հաջորդ օրը` հուլիսի 15-ին, կկատարի Արթուր Գրիգորյանի «Հայ իմ աշխարհ» երգը:Այս տարի մրցույթում կա եւս մեկ հայազգի ներկայացուցիչ Ռայա Մովսիսյանը` Կուրսկից, ով ներկայացնում է Ռուսաստանը:

«Սլավյանսկի բազար»-ը ներառում է շուրջ 60 միջոցառում, որոնք կանցկացվեն 13 հարթակներում: Դրանցից 18-ը տեղի կունենան գլխավոր հարթակում՝ Ամառային ամֆիթատրոնի բեմում:

Այս տարի «Սլավյանսկի բազար 2013»-ը ներկայանում է որպես փառատոնների փառատոն: Ավանդական մեկ շաբաթվա փոխարեն ընթացիկ տարում այն կտեւի հինգ օր՝ հուլիսի 11-ից մինչեւ 15-ը: Ուշադրության կենտրոնում լինելու են պատանի եւ պրոֆեսիոնալ կատարողների երաժշտական մրցույթները: Բացի դրանից, փառատոնի հիմնադիր երկրների՝ Ռուսաստանի, Ուկրաինայի եւ Բելառուսի առանձին համերգների փոխարեն, ինչպես լինում էր ավանդաբար, հուլիսի 12-ին կկայանա միասնական համերգ՝ «Բարեկամության համերգ: Հրավիրում է միութենական պետությունը»:

Փառատոնին կմասնակցեն 31 երկրների, այդ թվում՝ Ավստրալիայի, Մեծ Բրիտանիայի, Ֆրանսիայի, Գերմանիայի, Դանիայի, Ֆինլանդիայի, Իտալիայի, Իսրայելի, Կուբայի, Վենեսուելայի ներկայացուցիչներ: Մրցույթի ժյուրին կգլխավորի Լարիսա Դոլինան: