Վիտեբսկում մեկնարկում է «Սլավյանսկի բազար» փառատոնը

ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: Վիտեբսկում հուլիսի 11-ին մեկնարկում է «Սլավյանսկի բազար» 22-րդ փառատոնը: Ինչպես ավանդաբար, այս անգամ եւս Արվեստների միջազգային փառատոնի բացման մասին հանդիսավորապես կհայտարարի Բելառուսի նախագահը: «Արմենպրես»-ի հաղորդմամբ` մրցույթում Հայաստանը ներկայացնում է եX ֆակտոր-1« հեռուստատեսային նախագծի հաղթող Վրեժ Կիրակոսյանը: Մրցութային առաջին օրը նա կներկայացնի լեհ հեղինակ Չեսլավ Նեմենի «Этот странный мирե ստեղծագործությունը, իսկ հայերեն կկատարի Արթուր Գրիգորյանի «Հայ իմ աշխարհե-ը: Հայազգի Ռայա Մովսիսյանը` Կուրսկից, այս տարի մրցույթում կներկայացնի Ռուսաստանը:

Ինչպես լրագրողներին հայտնել է Բելառուսի մշակույթի առաջին փոխնախարար Վլադիմիր Կարաչեւսկին, «Սլավյանսկի բազար»-ը ներառում է շուրջ 60 միջոցառում, որոնք կանցկացվեն 13 հարթակներում: Դրանցից 18-ը տեղի կունենան գլխավոր հարթակում՝ Ամառային ամֆիթատրոնի բեմում:

Այս տարի «Սլավյանսկի բազար»-ը ներկայանում է որպես փառատոնների փառատոն: Կարաչեւսկու խոսքով՝ արդիականացում է տեղի ունեցել փառատոնի անցկացման տեւողությունը կրճատելու հաշվին: Ավանդական մեկ շաբաթվա փոխարեն ընթացիկ տարում այն կտեւի հինգ օր՝ հուլիսի 11-ից մինչեւ 15-ը: Ուշադրության կենտրոնում լինելու են պատանի եւ պրոֆեսիոնալ կատարողների երաժշտական մրցույթները: Բացի դրանից, փառատոնի հիմնադիր երկրների՝ Ռուսաստանի, Ուկրաինայի եւ Բելառուսի առանձին համերգների փոխարեն, ինչպես լինում էր ավանդաբար, հուլիսի 12-ին կկայանա միասնական համերգ՝ «Բարեկամության համերգ: Հրավիրում է միութենական պետությունը»:

Փառատոնին կմասնակցեն 31 երկրների, այդ թվում՝ Ավստրալիայի, Մեծ Բրիտանիայի, Ֆրանսիայի, Գերմանիայի, Դանիայի, Ֆինլանդիայի, Իտալիայի, Իսրայելի, Կուբայի, Վենեսուելայի ներկայացուցիչներ: Մրցույթի ժյուրին կգլխավորի Լարիսա Դոլինան: