2 րոպեի ընթերցում
ԵՐԵՎԱՆ, 4 ՀՈՒՆԻՍԻ, ԱՐՄԵՆՊՐԵՍ: ՀՀ արդարադատության նախարար Հրայր Թովմասյանի գլխավորած պատվիրակությունը ՌԴ արդարադատության նախարար Ա.լեքսանդր Կոնովալովի հրավերով հունիսի 5-ին աշխատանքային այցով կմեկնի Ռուսաստանի Դաշնության մայրաքաղաք՝ Մոսկվա: Ինչպես «Արմենպրես»-ին տեղեկացրին ՀՀ արդարադատության նախարարության հասարակայնության հետ կապերի վարչությունից, հունիսի 6-ին Հրայր Թովմասյանը կհանդիպի ՌԴ արդարադատության նախարարի, Գերագույն դատարանի և Գերագույն արբիտրաժային դատարանի նախագահների, Դաշնային նոտարական պալատի նախագահ Մ.Ի. Սազոնովայի, Պատիժների կատարման դաշնային ծառայության տնօրենի պաշտոնակատար Վ.Վ. Ծատուրովի, Դատական կարգադրիչների դաշնային ծառայության ղեկավար կազմի հետ:
Հանդիպումների ընթացքում կքննարկվեն դատական և իրավական համակարգերի բարեփոխումներին առնչվող հարցեր, կհստակեցվեն բարեփոխումների շրջանակում նախարարությունների միջև համագործակցության հիմնական ուղղությունները: Կքննարկվեն նաև միջազգային պայմանագրերի շրջանակներում ՀՀ և ՌԴ արդարադատության նախարարությունների միջև միջազգային-իրավական համագործակցության և տրամադրվող միջազգային իրավական օգնությանը վերաբերող հարցեր:
ՀՀ արդարադատության նախարարի գլխավորած պատվիրակության կազմում են ՀՀ արդարադատության նախարարի տեղակալներ Արամ Օրբելյանը և Եղիշե Կիրակոսյանը: