2 րոպեի ընթերցում
ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: Հայաստանի Հանրապետությունը դատաիրավական համակարգի բարեփոխումների ճիշտ ուղու վրա է գտնվում: Մայիսի 21-ին լրագրողների հետ հանդիպմանը նման համոզմունք հայտնեց Էստոնիայի Հանրապետության արդարադատության նախարար Հանո Պեւկուրը:
«Հայաստանը ճիշտ ուղու վրա է գտնվում: Դեռ շատ բան կա անելու, բայց ես վստահ եմ, որ հայերը կկարողանան դա իրականացնել»,- «Արմենպրես»-ի հաղորդմամբ՝ ասաց Պեւկուրը: Նախարարը նշեց, որ իրենց համար փորձառությամբ կիսվելն այն նվազագույնն է, որ կարող են անել Հայաստանի եւ տարածաշրջանի բարգավաճման համար: «Երեւանում իմ հանդիպումների ընթացքում ես լուրջ ցանկություն եմ տեսել` շարժվելու դեպի եվրոպական ստանդարտները՝ ներառյալ նաեւ արդարադատության եւ օրինապահ մարմինների գործունեության ոլորտում»,- ասաց Պեւկուրը՝ հավելելով, որ արդյունավետ քննարկումներ է ունեցել իր գործընկերների եւ ՀՀ վարչապետի հետ: Էստոնիայի արդարադատության նախարարը նշեց, որ Հայաստանում օրենքները լավն են, սակայն դրանց լիարժեք կիրարկման հարցերում դեռ անելիքներ կան:
Էստոնիայի Հանրապետության արդարադատության նախարար Հանո Պեւկուրի գլխավորած պատվիրակությունը եռօրյա այցով Երևան է ժամանել մայիսի 19-ին ՀՀ արդարադատության նախարար Հրայր Թովմասյանի պաշտոնական հրավերով: Էստոնիայի արդարադատության նախարարի այցին նախորդել էր ՀՀ արդարադատությանը նախարար Հրայր Թովմասյանի գլխավորած պատվիրակության այցը Էստոնիա՝ 2012թ. հոկտեմբերին: