2 րոպեի ընթերցում
ԵՐԵՎԱՆ, 15 ԱՊՐԻԼԻ, ԱՐՄԵՆՊՐԵՍ: Հայոց ցեղասպանության միջազգային ճանաչման գործում պետք է կիրառել նոր մեթոդներ: «Արմենպրես»-ի հաղորդմամբ` այս մասին ապրիլի 15-ին հրավիրված մամուլի ասուլիսին ասաց թուրքագետ Ռուբեն Մելքոնյանը:
«Հայոց ցեղասպանության գիտական ուսումնասիրության և միջազգային ճանաչման գործում մեր արած քայլերը բավականին լուրջ են, և մեծ առաջընթաց կա: Պետք է նաև նոր մեթոդներ կիրառել այս հարցում: Այսինքն` պետք է տեղեկատվական այս պատերազմում ոչ միայն պաշտպանվել, այլ նաև հարձակվել»,- նշեց Մելքոյանը:
Նա նաև ընդգծեց, որ Թուրքիայում Հայոց ցեղասպասնության հետ կապված զարգացումները կարելի է բաժանել երկու մասի:«Առաջինը պետական քաղաքականությունն է, որտեղ շարունակվում է կեղծիքը և հանգագործությունը կոծկելու միտումը: Երկրորդն այն է, որ թուրք հասարակության մեջ բավական հետաքրքիր զարգացումներ են լինում, մասնավորապես` եթե որևէ հասարակական գործիչ ցանկանում է ձեռք բերել ժողովրդավար գործչի անուն, նա անպայման պետք է հայտնի իր կարծիքը Հայոց ցեղասպանության մասին»,- ասաց Մելքոյանը:
Անդրադառնալով հայ-թուրքական միջպետական հարաբերություններին` Մելքոնյանն ասաց, որ Թուրքիան ավելի է խորացնում իր` անլուրջ գործընկեր լինելու համարումը:
«Նրանց քայլերը դեստրուկտիվ են, և հայ-թուրքական հարաբերությունները փակուղի են մտնում: Թուրքական իշխանությունները բավական մեծ ներդրումներ են անում թուրք երիտասարդների կրթության համար, որոնք չնայած նոր մեթոդներով են ուսանում, բայց հին մեթոդներով շարունակում են Թուրքիայի կեղծիքը»,- ասաց Մելքոնյանը:Նրա խոսքով` Հայաստանը գործ ունի մի պետության հետ, որը դաստիարակում է հակահայկական սերունդ:
Հայաստանի Հանրապետության Նախագահ Սերժ Սարգսյանի հրամանագրով Հայոց ցեղասպանության միջազգային ճանաչման եւ դատապարտման գործընթացը խթանելու ու Հայոց ցեղասպանության 100-րդ տարելիցին նվիրված միջոցառումները համակարգելու նպատակով, ստեղծվել է պետական հանձնաժողով եւ հաստատվել է հանձնաժողովի կազմը: Հանձնաժողովի նախագահը ՀՀ Նախագահ Սերժ Սարգսյանն է: