«Կովկաս շինարարություն եւ վերանորոգում Expo»-ին առաջին անգամ մասնակցեցին բանկային ընկերությունները
2 րոպեի ընթերցում
ԵՐԵՎԱՆ, 29 ՄԱՐՏԻ, ԱՐՄԵՆՊՐԵՍ: «Կովկաս շինարարություն եւ վերանորոգում Expo-2013» տասներորդ հոբելյանական միջազգային մասնագիտացված ցուցահանդեսը բացվեց մարտի 29-ին Երեւանում: Արդեն ավանդական դարձած ամենամյա միջազգային մասնագիտացված ցուցահանդեսը ամենախոշորն է Հայաստանում, որը մեծ խթան է մասնակից կազմակերպությունների գործնական կապերի ամրապնդման, հեղինակության բարձրացման, բիզնեսի զարգացման, ինչպես նաեւ շինարարական շուկայի վերաբերյալ տեղեկատվության հարստացման գործում:
Ցուցահանդեսին մասնակցում են շուրջ վաթսուն ընկերություններ Հայաստանից, Իտալիայից, Վրաստանից, Գերմանիայից եւ Ռուսաստանից:
«Արմենպրես»-ի փոխանցմամբ` ՀՀ էկոնոմիկայի նախարար Տիգրան Դավթյանը նշեց, որ նման ցուցահանդեսները հնարավորություն են տալիս հանրությանը ծանոթանալ գործարար աշխարհներին, ծանոթանալ նոր հնարավորություններին, ոլորտի նոր արտադրանքին, ինչպես նաեւ նոր գործընկերներ գտնել եւ շուկաներ ձեւավորել:
ՀՀ արդյունաբերողների եւ գործարարների միության նախագահ Արսեն Ղազարյանը ընդգծեց, որ ոլորտի ձեռնարկությունները հավակնում են շուկայում որակյալ ծառայություններ մատուցել եւ հավատում են, որ այս ոլորտը զարգացման տեմպեր ձեռք կբերի: «Շնորհակալություն այդ հավատի համար»,- ասաց նա:
Այս տարի ցուցահանդեսին առաջին անգամ ներկայանում են նաեւ բանկային ընկերությունները, որոնք մասնակցելով ցուցահանդեսին` ներկայացնում են հիփոթեքային, բնակարանների վերանորոգման վարկավորման եւ այլ ծառայություններ:
Ցուցահանդեսին ներկայացված էին շինարարական տեխնոլոգիաներ, տրանսպորտային միջոցներ, փայտե եւ մետաղյա հավաքածուներ, էներգո-ջերմա-ջրամատակարարման համակարգեր, կերամիկա եւ քար, ծածկեր եւ մեկուսիչներ, դռներ եւ պատուհաններ, կահույք եւ աքսեսուարներ, ինտերիերի եւ էքստերիերի դիզայն:
Մարտի 29-ին բացված ցուցահանդեսը բաց կլինի մինչեւ մարտի 31-ը: Ցուցահանդեսի պաշտոնական աջակիցներն են ՀՀ էկոնոմիկայի նախարարությունը, Հայաստանի արդյունաբերողների եւ գործարարների միությունը, հայաստանբի շինարարների միությունը, ճարտարապետների եւ դիզայներների միությունները:
