Լիտվայի Սեյմում պաշտոնապես հայտարարվել է ԼՂ-ի հետ միջխորհրդարանական բարեկամության խմբի ստեղծման մասին
2 րոպեի ընթերցում
ԵՐԵՎԱՆ, 14 ՄԱՐՏԻ, ԱՐՄԵՆՊՐԵՍ: Լիտվայի Սեյմի լիագումար նիստում պաշտոնապես հայտարարվել է Լեռնային Ղարաբաղի հետ միջխորհրդարանական կապերով բարեկամության խմբի ստեղծման մասին: Ինչպես հաղորդում է «Արմենպրես»-ը` վկայակոչելով delfi.lt-ը, նիստը նախագահող Վիտաուտաս Գապշիսն ընթերցել է խմբի ստեղծման մասին հայտարարությունը, ցանկացողներին հրավիրել միանալ դրան և հայտարարել խմբի առաջին նիստի մասին:
Լիտվայի արտաքին գործերի նախկին նախարար Աուդրոնյուս Աժուբալիսը մտավախություն է հայտնել, որ նման խմբի ստեղծումը կվնասի Լիտվայի պաշտոնական արտաքին քաղաքականությանը:
Խմբի անդամներից պատգամավոր Դանգուտե Միկուտենեն ընդգծել է, որ չճանաչված շրջանների հետ Սեյմում ստեղծված են բարեկամական այլ խմբեր ևս: «Լիտվան ժողովրդավարական պետություն է, Սեյմի անդամի մանդատն ազատ է, Սեյմի անդամները կարող են բարեկամություն անել այլ երկրների խորհրդարանների հետ, անգամ եթե դրանք պաշտոնապես ճանաչված չեն: Գուցե շարունակեմ ձեզ ներկայացնել ցուցակը, որտեղ ընդգրկված են նաև ձեր խմբակցության անդամները` Կուբա, Թայվան, Չեչնիա, Տիբեթ»,- դիմելով Աժուբալիսին` ասել է Միկուտենեն:
ԼՂ-ի հետ միջխորհրդարանական բարեկամական խմբի ստեղծման առնչությամբ Լիտվայում Ադրբեջանի դեսպանը բողոքի նոտա է հղել այդ երկրի ԱԳ նախարարությանը, որում նշվել է, թե դա կարող է բացասականորեն անդրադառնալ երկկողմ հարաբերությունների վրա: