Շուշան Պետրոսյանը ջազ համերգ կտա Գյումրիում

ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: «Ջազը եւ Գյումրին» նախագծի շրջանակում մարտի 13-ին Գյումրիի «Հոկտեմբեր» կինոթատրոնի դահլիճում տեղի կունենա ՀՀ վաստակավոր արտիստ Շուշան Պետրոսյանի համերգը: «Արմենպրես»-ի թղթակցի հետ զրույցում «Եկել է իրական արվեստը գնահատելու ժամանակը» խորագրի ներքո անցկացվող նախագծի հիմնադիր Մկրտիչ Մանուկյանը նշեց, որ կայանալիք ջազային համերգը երրորդն է Գյումրիում:

«Առաջին համերգը տեղի ունեցավ 2012 թվականի նոյեմբերին, որին մասնակցում էր դաշնակահար Վահագն Հայրապետյանը, ինչպես նաեւ «Նյու-Յորք-Երեւան» ջազ քառյակի ամերիկյան ջազմենները: Համերգից առաջ հյուրերը նաեւ վարպետության դասեր անցկացրին քաղաքի ուսանողների համար»,- պատմեց Մանուկյանը: Նրա խոսքով` հենց առաջին համերգի առաջացրած հետաքրքրությունն էլ պատճառ է դարձել այն շարունակական դարձնելու համար:

«Ջազը եւ Գյումրին» ծրագրի շրջանակում երկրորդ` «Չիկո եւ ընկերներ» համերգը կայացել է նախորդ տարվա դեկտեմբերին:

Մանուկյանի համար ջազային նախագիծ հիմնելու համար հիմք է հանդիսացել նաեւ այն, որ նա 12 տարի զբաղվում է համերգների կազմակերպմամբ, ինչպես նաեւ կես տարի առաջ Գյումրիում հիմնել է իր ջազ ակումբը:

«Լեփ-լեցուն դահլիճները ցույց տվեցին, որ գյումրեցիները սիրում ես լսել ջազ»,- հավաստիացրեց նախագծի հիմնադիրը:

Ծրագրի նպատակն է Գյումրիում երաժշտասերներին ներկայացնել հայ եւ արեւմտյան ջազ երաժիշտների արվեստը: Նախագիծն իրականացնում են «Մանուկյան պրոդաքշն»-ը եւ Գյումրու ջազ ակումբը: