Րաֆֆի Հովհաննիսյանն պետք է հստակեցնի իր քայլերը. քաղաքագետ

ԵՐԵՎԱՆ, 28 ՓԵՏՐՎԱՐԻ, ԱՐՄԵՆՊՐԵՍ: Հայաստանում նախագահի ընտրություններից հետո ստեղծված ներքաղաքան իրավիճակը բացառիկ հնարավորություն կարող է լինել երկրում քաղաքացիական քաղաքակիրթ հասարակություն ձեւավորելու համար: Փետրվարի 28-ին լրագրողների հետ հանդիպման ժամանակ նման կարծիք հայտնեց քաղաքագետ Լեւոն Շիրինյանը: Նա նշեց, որ ընտրությունների արդյունքները չընդունող ընդդիմադիր թեկնածու Րաֆֆի Հովհաննիսյանը պայքարի քաղաքակիրթ ուղի է ընտրել, որն աննախադեպ է Հայաստանի համար: «Ի տարբերություն նախորդ տարիների, այս անգամ երկրորդ տեղը գրաված եւ ընտրությունների արդյունքները վիճարկող թեկնածուն պայքարի նոր եւ քաղաքակիրթ ուղի է ընտրել, ինչի հետեւանքով հնարավոր է դառնում խուսափել ավելորդ բախումներից»,-«Արմենպրես»-ի հաղորդմամբ՝ ասաց նա՝ աննախադեպ համարելով նաեւ Րաֆֆի Հովհաննիսյանի՝ կես միլիոնից ավելի ձայներ հավաքելը:

Քաղաքագետի խոսքով՝ եթե Րաֆֆի Հովհաննիսյանը համակարգի իր քայլերը եւ հստակ նպատակներ դնի իր առջեւ, նրա ձեռնարկած գործը կարող է իր համար ցանկալի արդյունք ապահովել: Առաջին գործը պետք է լինի հասնել արտահերթ խորհրդարանական ընտրությունների նշանակմանը: «Րաֆֆի Հովհաննիսյանը պետք է ավելի հստակ քայլեր իրականացնի: Այս պահին ամեն ինչ չէ, որ նրա օգտին է ընթանում, որովհետեւ նա դեռ հստակ չի որոշել, թե ինչի է ուզում հասնել: Նա պետք է մոռանա այս ընտրությունների մասին եւ փորձի պայքարել նոր խորհրդարանի ձեւավորման համար»,- ասաց Շիրինյանը:

ՀՀ նախագահի ընտրությունների վերջնական արդյունքներով վերընտրվել է գործող նախագահ Սերժ Սարգսյանը` ստանալով ընտրողների 861 հազար 373 (58,64%) ձայն: Րաֆֆի Հովհաննիսյանը ստացած ձայների առավելությամբ երկորդ տեղում է` 539 հազար 693 (36,74 %): Րաֆֆի Հովհաննիսյանը, սակայն, չի ընդունում ընտրությունների արդյունքները: