ԵՐԵՎԱՆ, 17 ԴԵԿՏԵՄԲԵՐԻ, ԱՐՄԵՆՊՐԵՍ: Ամանորի գիշերը հեռուստացույցը Նոր տարին տանը դիմավորող տարբեր խավի եւ նախասիրությունների տեր մարդկանց անբաժանելի ուղեկիցն է: Հենց «կապույտ էկրանի» ուսերին է ընկած տոնը ուրախ դարձնելու կարեւոր առաքելությունը: Հեռուստադիտողի ուշադրությունը գրավելու մենաշնորհը այն հեռուստաընկերություններին բաժին կհասնի, որոնց կհաջողի եթերը ապահովել ոչ միայն տոնական, այլեւ նոր եւ հետաքրքրական հաղորդումներով:
Նոր տարվա եթերը պետք է լինի տոնըընտանեկան միջավայրում վայելելու լավագույն միջոց
«Արմենպրես»-ի թղթակցի հետ հետ զրույցում` Հայկական «ՓԻԱՌ» ասոցացիայի գիտատեղեկատվական հասարակական կազմակերպության նախագահԱստղիկ Ավետիսյանը նշեց, որ հայկական հեռուստաեթերը վերջին տարիներին ամենասպասվածը չէ հայ մարդու համար:«Տարիներ առաջ, բոլորս հիշում ենք, որ Նոր տարվա եթերը անպայման ընտանեկան միջավայրում վայելելու լավագույն միջոցն էր, սակայն տարեցտարի այն դառնում է դիմազուրկ ու անհետաքրքիր։ Գրեթե ոչինչ չի փոխվում, բոլոր տոնական ծրագրերը նույնն են, յուրաքանչյուր հեռուստաընկերության ղեկավարի համար նախընտրած երգիչներն ու երգչուհիները, դերասանները հայտնվում են եթերում եւ փորձում տոն կազմակերպել»,- ասաց կազմակերպության նախագահը: Նրա խոսքով` ամանորի հեռուստաեթերը ծրագրելիս` հեռուստալիքները մոռանում են հաշվի առնել այն կարեւոր հանգամանքը, թե ի՞նչ է ցանկանում դիտել հեռուստադիտողը եւ տվյալ հաղորդումը ի՞նչ նորություն է պարունակում։
ԵՊՀ հրատարակչության «Հեռուստածրագրերի տիպաբանություն. հեռուստահաղորդումների դասակարգման չափանիշներ» գրքի հեղինակ Ավետիսյանի համոզմամբ` հեռուստածրագրում ամբողջ տարվա ընթացքում ժամանցային ծրագրերն այնքան շատ են, որ այս օրերին հեռուստաեթերը չի փայլում բովանդակային առումով։«Կարծում եմ` տոնական հաղորդումներում իրենց տեղը պետք է ունենա նաեւ սովորական մարդը` իր ուրախություններով ու հետաքրքրություններով, հեռուստաընկերությունները պետք է դառնան ինտերակտիվ, հետադարձ կապի հնարավորությունը գնալով սահմանափակվում է»,- նշեց փորձագետը: Նա նաեւ հավելեց, որ Նոր տարին հայ մարդու համար սպասումի, ակնկալիքների, նորին ձգտելու եւ հասնելու հետ է ասոցացվում, եւ որքան էլ առկա լինի վատ տրամադրություն, որքան էլ նեղացած լինենք մեր հարազատներից, այդ օրերին մարդիկ փորձում են մոռանալ ամեն բան եւ յուրովի դիմավորել Ամանորը։
Ամանորին հայկական հեռուստաեթերը խոստանում է լինել ոչ միայնտոնական, այլեւ նոր
Հայաստանի Հանրայինհեռուստառադիոընկերության խորհրդիաշխատակազմի ղեկավարԱրմեն Անդրեասյանը«Արմենպրես»-ի հետ զրույցում նշեց, որ նախքան 24:00-ն` Առաջին ալիքի եթերում կլինի տոնական «Երգ երգոց» հաղորդաշարը:«Կեսգիշերից հետո տեղի կունենա ռեժիսոր Ելենա Արշակյանի «Ծաղկաձոր Չիկագո տրանզիտ» ֆիլմի պրեմիերան»,- ասաց Անդրեասյանը: Նրա խոսքով` հանրայինի եթերը ոչ միայն հունվարի 1-ին, այլեւ առաջիկա օրերին հագեցած կլինի նոր եւ տոնական հաղորդաշարերով:
«Արմենիա» հեռուստաընկերության ծրագրերի կոորդինատոր Մարիաննա Քարդաշյանը տեղեկացրեց, որ հեռուստաընկերությունը հատուկ անակնկալ է պատրաստել հեռուստադիտողների համար` «Իմ նոր տարին» ամանորի ծրագրի տեսքով, որը կնախորդի եւ կհաջորդի 24:00-ն:««Իմ նոր տարին» կպատմի այն մասին, թե ինչպես է Ձմեռ պապիկը որոշում այցելել «Արմենիա» TV, եւ «Եզրագծից այն կողմ» հեռուստասերիալի փոքրիկ դերասանուհի Անին, տեղեկանալով այդ մասին, փախչում է տնից Ձմեռ պապիկին հեռուստաընկերությունը ցույց տալու համար»,- ասաց ծրագրերի կոորդինատորը:Նա նաեւ նշեց, որ «Իմ նոր տարին» ծրագրի ավարտից հետո` եթերում կլինի «Հայաստանի ձայնը» հեռուստանախագծի ներկայացուցիչների մասնակցությամբ դիսկոտեկ, այլ անակնկալներ:
«Շանթ» հեռուստաընկերության ամանորի եթերում տեղ կգտնի նաեւ քաղաքականությունը. հումորի տեսքով անդրադարձ կլինի նաեւ նախորդ եւ գալիք ընտրական տարվան: Հումորային նմանակումներ իրականացնողների թվում կլնեն ոչ միայն VitaminClub հայկական հումորային շոուի տղաները, այլեւ դերասան Վարդան Պետրոսյանը:
«Երկիր մեդիա» հեռուստաընկերության` «Երկրի Ամանորը» համերգային ծրագրին իրենց մասնակցությունը կուենան հայկական երգարվեստի ներկայացուցիչները:«Ամանորյա եթերում ծրագերը, հաղորդումները կունենան տոնական թեմատիկա, ժամանցային ուղղվածություն»,- ասաց ծրագրերի ղեկավար Սուսաննա Տոնիկյանը: Նա հավելեց, որ հեռուստաընկերության տոնական եթերը անուշադրության չի մատնի նաեւ փոքր հեռուստադիտողին` ցուցադրելով նաեւ մուլտֆիլմեր:
«Ռոսիա» հեռուստաընկերության ֆիրմային բաղադրատոմս` ավանդական «Голубой огонек» եւ Ռուսական առաջին ալիքի «Оливье-шоу»-ն հայ հեռուստադիտողներին հետաքրքրող հաղորդումների թվում են:Համաձայն պաշտոնական ուսումնասիրությունների` յուրաքանչյուր երկրում ամենալայն դիտողականությունն են վայելումերկրի ղեկավարի`24:00-ին անմիջապես նախորդող շնորհավորական ուղերձը:
Պատրաստեց Տաթեւիկ Գրիգորյանը