Երգի պետական թատրոնի ամանորի անակնկալը «Կախարդական դաշնամուր» մյուզիքլն է

ԵՐԵՎԱՆ, 12 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի երգի պետական թատրոնի ամանորի «Կախարդական դաշնամուր» մանկական մյուզիքլի պրեմիերան տեղի կունենա դեկտեմբերի 24-ին: «Արմենպրես»-ի թղթակցի հետ զրույցում մյուզիքլի հեղինակ, բեմադրող, Երգի պետական թատրոնը գեղարվեստական ղեկավարԱրթուր Գրիգորյանը նշեց, որ «Կախարդական դաշնամուր»-ը ստեղծվել է թատրոնի խաղացանկում նախկինում ընդգրկված երկու` «Ուրախ նոտաներ» եւ համանուն «Կախարդական դաշնամուր»երաժշտական ներկայացումների հիման վրա:

«Մյուզիքլում կհնչեն 11-12 երգեր: Այստեղ ներկայացված դաշնամուրը նաեւ խոսում է, այն չի սիրում վատ երգիչների»,- ասաց Գրիգորյանը: Նրա խոսքով` ինչպես իրական երաժշտարվեստում, այնպես էլ այս մյուզիքլում գլխավոր հերոսը չի ցանկանում, որ որակյալ երաժշտությունը «փչանա սինտեզատորների միջոցով»:

«Իհակե, առաջին շարքերում մեր հանդիսականները երեխաներ են, սակայն մյուզիքլը չունի տարիքային սահմանափակում. այն եւ մեծերի, եւ փոքրերի համար է»,- ասաց Գրիգորյանը:

Անդրադառնալով ամանորի թեմատիկա ունեցող երգերին` նա նշեց, որ այսօր, ի տարբերություն նախորդ տարիների, ամանորի թեմատիկա ունեցող երգերը նահանջել են:

«Պարտադիր չէ, որ Նոր տարվա մասին երգում հենց «Նոր տարի» բառը հնչի, կարեւորը երգի տոնական մթնոլորտ է, որ ստեղծվում է երգի շուրջ»,- կարծում է Երգի պետական թատրոնը գեղարվեստական ղեկավարը, ով Ամանորի մասին մի շարք հանրահայտ, այդ թվում` «Նոր տարի», «Իմ նոր տարի» երգերի հեղինակն է:

Գրիգորյանը նշեց, որ հատկապես 1980-ականներին ընդունված էր, երբ ամեն տարի հեռուստատեսությունը նախապես պատվիրում էր ամանորի երգ, որը եթերում հնչում էր 00:05 րոպեին: