1 րոպեի ընթերցում
ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: Կալիֆորնիայի նահանգային Սենատն ընդունելություն է կազմակերպել ԱՄՆ-ում գտնվող Լեռնային Ղարաբաղի Հանրապետության Ազգային ժողովի նախագահ Աշոտ Ղուլյանի պատվին: Ինչպես հաղորդում է «Արմենպրես»-ը` վկայակոչելով Հանրային ռադիոյի «Ռադիոլուր» լրատվական ծրագիրը, Ղարաբաղի բարձրաստիճան պաշտոնյային նահանգային Սենատում հյուրընկալելու նախաձեռնությունը նահանգային իշխանությունների ներկայացուցիչ Քաչո Աչաջյանինն ու սենատոր Քեվին դե Լեոնինն է եղել:
ԼՂՀ ԱԺ խոսնակը հավաքվածներին կարճ ներկայացրել է Արցախի տնտեսական վիճակը, երկրի արտաքին քաղաքական օրակարգն ու ծառացած խնդիրները: Նա խոսել է նաև Լեռնային Ղարաբաղի հակամարտության կարգավորման ներկա փուլի և Ադրբեջանի ապակառուցողական դիրքորոշման մասին:
Իր հերթին սենատոր Քեվին դե Լեոնը հույս է հայտնել, որ ակտիվ աշխատանքի շնորհիվ հնարավոր կլինի հասնել առկա խնդիրների լուծմանը:
«Մեծ է հավանականությունը, որ Կալիֆորնիայի Սենատը կճանաչի ԼՂՀ անկախությունը: Հավանական է, որ մենք առաջիկայում այցելենք Արցախ և ծանոթանանք այդ երկրին»,- ասել է դե Լեոնը: