Ստեփանակերտից թռիչքներ թույլ տալու դեպքում Ադրբեջանը ստիպված կլինի ճանաչել ԼՂՀ-ը. Ադրբեջանի նախագահի նախկին խորհրդական
2 րոպեի ընթերցում
ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: Ադրբեջանում շարունակվում են Ստեփանակերտի օդանավակայանը շահագործման հանձնելու շուրջ քննարկումները: Ինչպես հաղորդում է «Արմենպրես»-ը` վկայակոչելով ադրբեջանական ԶԼՄ-ները, ադրբեջանական «Հանդուրժողականություն» հետազոտությունների կենտրոնի ղեկավար Ազեր Ռաշիդօղլուն այդ առնչությամբ հայտարարել է, որ «Լեռնային Ղարաբաղից միջազգային թռիչքների իրագործումը գլխացավանք կդառնա Ադրբեջանի համար»:
Ռաշիդօղլուի խոսքով` ամենայն հավանականությամբ, Եվրոպայի եւ ԱՄՆ-ի հայկական սփյուռքի շնորհիվ, Ստեփանակերտի օդանավակայանը կգովազդվի: «Ես չեմ զարմանա, եթե Ղարաբաղի օդանավակայանում իջնի Շառլ Ազնավուրը: Այդ ժամանակ Ադրբեջանի համար բարդ կլինի խոչընդոտել այդ օդանավակայանից թռիչքները», -ընդգծել է նա: Փորձագետն ասել է նաեւ, որ Ռուսաստանին շահավետ կլիներ խաղաղարար ուժեր տեղակայել Լեռնային Ղարաբաղում եւ, որ նման հանգամանքերում, Ադրբեջանի համար արդեն անհնար կլինի վերադարձնել Ղարաբաղը:
Ադրբեջանի նախագահի նախկին խորհրդական, քաղաքագետ Վաֆա Գուլուզադեն էլ նշել է, որ Ադրբեջանը «չի կարող եւ չպետք է թույլ տալ թռիչքներ Ղարաբաղից Երեւան»: «Եթե դա տեղի ունենա, ապա Ադրբեջանը ստիպված կլինի ճանաչել նաեւ Լեռնային Ղարաբաղի Հանրապետության անկախությունը», -համոզմունք է հայտնել նա: