Իոսիֆ Կոբզոնի երեւանյան համերգի հասույթը կուղղվի Գյումրիի երաժշտական դպրոցներին

ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ: ԽՍՀՄ ժողովրդական արտիստ Իոսիֆ Կոբզոնի երեւանյան համերգը տեղի կունենա Արամ Խաչատրյան մեծ համերգասրահում նոյեմբերի 22-ին: 50-րդ հոբելյանական համերգային շրջագայությունը կրում է «Ես սիրում եմ քեզ կյանք» խորագիրը: «Արմենպրես»-ի թղթակցի հետ զրույցում համերգի նախաձեռնող, «Созвездие» բարեգործական ֆոնդի հայաստանյան գրասենյակի տնօրեն Մերի Ստեփանյանը նշեց, որ կայանալիք համերգը բարեգործական ուղղվածություն ունի:

«Համերգի ողջ հասույթը կուղղվի Գյումրիի բոլոր երաժշտական դպրոցների` երաժշտական նոր գործիքների համալրմանը»,- ասաց Ստեփանյանը: Նրա խոսքով` Կոբզոնի համերգի կայացման գաղափարը բավականին համպատրաստից է առաջացել, սեղմ ժամկետներում, սակայն մեծ էր կազմակերպիչների ցանկությունը ռուսական էստրադայի լեգենդի երեւանյան համերգը հավուր պատշաճի իրականացնելու:

Բացի ԽՍՀՄ ժողովրդական արտիստից երեւանյան բեմում ելույթ կունենան նաեւ երաժշտական խմբեր եւ անհատ կարտարողներ Ռուսաստանից եւ Հայաստանից: Գրասենյակի տնօրենի տեղեկացմամբ` երգիչը Երեւան կժամանի նոյեմբերի 21-ին եւ մայրաքաղաքում կանցկացնի երեք օր:«Նախատեսվում է Կոբզոնի հանդիպումը ՀՀ նախագահի հետ, ինչպես նաեւ նա մեծ ցանկություն է հայտնել այցելել Առնո Բաբաջանյանի գերեզման»,- ասաց Ստեփանյանը:

Նոյեմբերի 22-ին կայանալիք համերգին կնախորդի Կոբզոնի հանդիպումը զանգվածային լրատվական միջոցների ներկայացուցիչների հետ: «Ես սիրում եմ քեզ կյանք» համերգին կհնչեն հին ու նոր սիրված ստեղծագործություններ: Առաջիկա համերգը Կոբզոնի առաջին բեմելը չէ Հայաստանում, նա խորհրդային եւ հետխորհրդային տարիներին բազմաթիվ համերգներ է ունեցել Երեւանում: Իոսիֆ Կոբզոնը նաեւ «Մեսրոպ Մաշտոց» շքանշանակիր է:

«Созвездие» բարեգործական ֆոնդը հիմնադրվել է 2001 թվականին, որի նպատակն է ԱՊՀ ամբողջ տարածքում խթանել գիտության, մշակույթի եւ սպորտի զարգացումը: Հիմնադրումից ի վեր ֆոնդն իրականացնում է մի շարք սոցիալական ծրագրեր: Հիմնադրամի գրասենյակները գործում են Նիժնի Նովգորոդում, Մոսկվայում, Երեւանում եւ Կիեւում: