«Կորած մոլորվածը Հայաստանում» ֆիլմում նկարահանվել են նաեւ հոլիվուդյան դերասաններ

ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: Ամերիկաբնակ ռեժիսոր Գոռ Կիրակոսյանի«Կորած մոլորվածը Հայաստանում» (Lost and found in Armenia) ֆիլմի հայաստանյան պրեմիերան տեղի կունենա «Մոսկվա» կինոթատրոնում նոյեմբերի 22-ին: «Արմենպրես»-ի հետ զրույցում դերասան, ռեժիսոր Միքայել Պողոսյանը նշեց, որ մեծ սիրով է մասնակցել «Կորած մոլորվածը Հայաստանում» ֆիլմի նկարահանումներին:«Գոռը տաղանդավոր ռեժիսոր է եւ մեծ հեռանկարներ ունի: Հուսով եմ, որ ֆիլմը մեծ աղմուկ կհանի, մեծ հաճույքով եմ աշխատել դերասանական կազմի հետ, ինձ շատ «հարմարավետ» եմ զգացել ֆիլմում»,- ասաց Պողոսյանը:

Սիրային կատակերգությունը պատմում է ամերիկացի երիտասարդի մասին, ում լքել է ընկերուհին: Ընկերները տանում են նրան Թուրքիա հանգստանալու: Հանգստի ընթացքում, երբ հերոսը որոշում է զբաղվել էքստրեմալ ժամանցով եւ թռչելօդապարիկով, ջրային մոտոցիկլետից պոկվում է օդապարիկի պարանը, եւ հերոսը վերեւ է թռչում: Օդում նրա պարանը փաթաթվում է ինքնաթիռին եւ արդյունքում, երբ պարանը պոկվում է, նա հայտնվում է հայկական գյուղերից մեկի գոմում: Հերոսը, կարծելով Թուրքիայում է, սկսում է թուրքերեն բառեր ասել, հայերն էլ նրան թշնամու տեղ են դնում:

Ռոմանտիկ կատակերգության բուն իմաստն այն է, որ այն մարդը, ով թշնամի է թվում, կարող է լավագույն բարեկամը դառնալ:

Ֆիլմի նկարահանումները մեկնարկել էին 2011 թվականի հունվարին: Պրոդյուսերներն են Վալերի Մաքքեֆրին եւ Մարալ Ջերեջյանը: «Կորած մոլորվածը Հայաստանում» ֆիլմում նկարահանվել են հոլիվուդյան դերասաններ Ջեմի Քեննեդին, Դեյվ Շերիդանը, Անժելա Սարաֆյանը, Մուրիսա Հարբան, ինչպես նաեւԴավիթ Թովմասյանը, Վաչիկ Մանգասարյանը, Միքայել Պողոսյանը, Հրանտ Թոխատյանը:Առաջիկայում բացառված չէ ֆիլմի մասնակցութունը տարբեր կինոփառատոներին: