2 րոպեի ընթերցում
ԵՐԵՎԱՆ, 10 ՆՈՅԵՄԲԵՐԻ, ԱՐՄԵՆՊՐԵՍ: Երևանի «Եվրոպական ուսանողների ֆորում» երիտասարդական հասարակական կազմակերպությունը և Հայաստանում Եվրոպական միության պատվիրակության մասնակցությամբ մեկնարկեց «Հայաստանում Եվրոպական միության մոդել 2012թ.» (ՀԵՄՄ 2012) խորհրդաժողովը: «Արմենպրես»-ի փոխանցմամբ՝ խորհրդաժողովում իր ողջույնի խոսքը հղեց Եվրոպական ուսանողների ֆորումի նախագահ Լուիս Ալվարադո Մարտինեսը: «Մեր նախագիծը իր ավարտին չի հասնի, մինչև որ կովկասյան տարածաշրջանը չմիանա մեզ: Բայց այդ անելու համար մենք պետք է փոխենք մեր մտածողությունը և գործողությունների եղանակը»,- նշեց Մարտինեսը: Նա ընդծեց երիտասարդների ունեցած մեծ դերակատարությունն այդ հարցում:
Տեսաուղերձով հանդես եկավ Եվրախորհրդարանի նախագահ Մարտին Շուլցը: Ելույթներ ունեցան նաեւ «Երևանի ուսանողների ֆորում» ՀԿ նախագահ Արմենակ Մինասյանցը, ֆորումի անդամներ: Քննարկվեցին ԵՄ արևելյան գործընկերության, ժողովրդավարության, մարդու իրավունքների և այլ հարցեր:
Եվրոպական ուսանողների ֆորումը` (AEGEE) կազմակերպություն է, որը նպաստում է Եվրոպայի երիտասարդների համագործակցությանը, հաղորդակցությանը և Եվրոպայի ամբողջականությանը: Լինելով ոչ պետական, քաղաքականորեն անկախ և շահույթ չհետապնդող կազմակերպություն` AEGEE-ն բաց է բոլոր ուսանողների և երիտասարդների առջև և այսօր այն ունի 13. հազար անդամ` եվրոպական 40 երկրներում և ավելի քան 200 համալսարանական քաղաքներում` Եվրոպայում այն դարձնելով ամենամեծ ուսանողական կազմակերպությունը: AEGEE-ն ունի խորհրդատվական կարգավիճակ Եվրոպայի Խորհրդում, ՄԱԿ-ում, ՅՈՒՆԵՍԿՕ-ում:
Կազմակերպության հիմնական նպատակներն են` առանց նախապաշարմունքների խթանել միավորված Եվրոպային, ջանալ ստեղծել բաց և հանդուրժող հասարակություն, զարգացնել ժողովրդավարությունը, մարդու իրավունքները, հանդուրժողականությունը, սահմանային համագործակցությունը, կրթության մեջ շարժունակությունը և եվրոպական չափանիշները: