ԱՄՆ-ում դեմոկրատների հաղթանակը Հայաստանի համար ավելի ձեռնտու է. քաղաքագետ

ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ: ԱՄՆ նախագահական ընտրություններում Հայաստանի և հայության համար ավելի ձեռնտու է դեմոկրատների թեկնածուի հաղթանակը: Հոկտեմբերի 27-ին լրագրողների հետ հանդիպմանը նման տեսակետ հայտնեց քաղաքագետ Լեւոն Շիրինյանը: Նրա խոսքով` հանրապետականների հաղթանակը տարածաշրջանում լարվածության աճի կհանգեցնի: «Ի տարբերություն հանրապետականների` դեմոկրատները Ռուսաստանին չեն դիտարկում որպես իրենց աշխարհաքաղաքական հակառակորդ և Իրանի նկատմամբ ագրեսիվությունը դեմոկրատների մոտ պակաս է»,- «Արմենպրես»-ի փոխանցմամբ` ասաց Շիրինյանը:

Քաղաքագետի կարծիքով` Օբաման, վերընտրվելու դեպքում, կփորձի լեզու գտնել Իրանի հետ: Շիրինյանը վստահ է, որ մոտ ապագայում ԱՄՆ-ը չի ճանաչի Հայոց ցեղասպանությունը: «ԱՄՆ-ը չի ուզում Հայոց ցեղասպանությունը ճանաչելու պատճառով զրկվել Թուրքիայի վրա ազդելու լծակից»,- ընդգծեց քաղաքագետը:

ԱՄՆ նախագահական ընտրությունները տեղի կունենան նոյեմբերի 6-ին: Հաղթողի հիմնական հավակնորդներն են` հանրապետական Միթ Ռոմնին և դեմոկրատ Բարաք Օբաման: