2 րոպեի ընթերցում
ԵՐԵՎԱՆ, 10 ՀՈԿՏԵՄԲԵՐԻ, ԱՐՄԵՆՊՐԵՍ: Ստեփանակերտի օդանավակայանի վերաբերյալ Թուրքիայի հայտարարությունները միմիայն բարոյահոգեբանական հարթության վրա են: Թուրքիային ձեռնտու չէ օդային ուղիների փակումը, քանզի հայերը ևս իրենց լծակներն ունեն: Այս մասին հոկտեմբերի 10-ին կայացած ասուլիսի ժամանակ հայտնեց ռազմական փորձագետ Դավիթ Ջամալյանը:«Արմենպրես»-ի հաղորդմամբ` անդրադառնալով զորավարժություններին, որոնք արդեն երկու շաբաթ է մեկնարկել են` ռազմական փորձագետը խիստ կարևորեց դրանց անցկացումը, քանզի բանակը իր պատրաստվածությամբ պիտի կանխի մեծ պատերազմները:
«Այս զորավարժությունները բանակի մարտունակությունն առավել բարձրացնելու մեծ քայլն են: Այս մեկ ամսվա ընթացքում, երբ իրականացվում էր արդեն ծառայածների ռեզերվի զորահավաքը, որոշակի անհանգստություն սկսվեց հասարակության մեջ, որը, սակայն, հիմնավորված չէ, քանզի այս զորավարժությունները պլանային միջոցառումներ են և առաջնագծում ամեն ինչ հանգիստ է»,-ասաց Ջամալյանը` շեշտելով, որ պետք է հասարակությանը պատրաստել նման միջոցառումներին` ավելորդ աղմուկից խուսափելու համար:
ՀՀ զինված ուժերի մարտական պատրաստության պլանի համաձայն` շարունակվում են հոկտեմբերի 1-ից մեկնարկած ռազմավարական հրամանատարաշտաբային զորավարժությունները:Զորավարժությունների պլանի համաձայն` փորձակվել են անօդաչու թռչող սարքերը, առաջին անգամ հակատանկային ստորաբաժանումները գործնականում կիրառել են նոր հակատանկային միջոցները, որոնք նախատեսված են հակառակորդի ակտիվ պաշտպանություն ունեցող զրահատեխնիկան խոցելու համար, մեկ անգամ ևս հստակեցվել են հրթիռային զորքերի խմբավորման և կիրառման հարցերը: