Մարդասպանին ներում շնորհելու Ադրբեջանի իշխանությունների որոշումը հակասում է միջազգային իրավունքի նորմերին. Բորդյուժա

ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Հայ սպայի մարդասպանին ներում շնորհելու եւ ազատ արձակելու Ադրբեջանի իշխանությունների որոշումը հակասում է միջազգային իրավունքի նորմերին, կասկածի տակ է առնում հանցավորության դեմ պայքարի միջպետական համակարգի գործունակությունը: Այս մասին ընդգծել է Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժան` սեպտեմբերի 3-ին տարածած հայտարարությամբ: «Այս քայլը, որն ակնհայտորեն արվել է քաղաքական կոնյունկտուրային նպատակներից ելնելով, ոչնչով չի կարող արդարացվել: Ավելին, հանցագործի հերոսացումը կարող է նպաստել տարածաշրջանի առանց այն էլ մեծ լարվածության ավելացմանը: Համոզված եմ, որ միջազգային հանրությունը չի հապաղի տալ կատարվածի օբյեկտիվ գնահատականը»,-«Արմենպրես»-ի հաղորդմամբ` հայտարարել է Բորդյուժան:

Ադրբեջանցի ոճրագործ Ռամիլ Սաֆարովը 2004թ. փետրվարի 19-ին կացնահարել է Բուդապեշտում ՆԱՏՕ-ի դասընթացներին մասնակցող հայ սպա Գուրգեն Մարգարյանին: Սաֆարովը դատապարտվել է ցմահ ազատազրկման 30 տարի առանց ներման իրավունքի: 2012թ. օգոստոսի 31-ին նա Հունգարիայի կողմից էքստրադիցիայի է ենթարկվել Ադրբեջան եւ նույն օրը ներման արժանացել այդ երկրի նախագահի կողմից:Հայաստանը կասեցրել է դիվանագիտական հարաբերությունները Հունգարիայի հետ: