Մխիթարյանը վստահ է, որ իր նախկին մարզիչ Կոստովի գլխավորությամբ «Կարպատներում» լավ թիմ կկառուցվի

ԵՐԵՎԱՆ, 24 ՕԳՈՍՏՈՍ, ԱՐՄԵՆՊՐԵՍ: Հայաստանի ազգային հավաքականի եւ «Շախտյոր»-ի ֆուտբոլիստ Հենրիխ Մխիթարյանը հարցազրույց է տվել «Հանքափորների» պաշտոնական կայքին: «Արմենպրես»-ը ներկայացնում է հարցազրույցն ամբողջությամբ.

-Հենրի՚խ, «Կարպատներ»-ի դեմ խաղն առանձնահատուկ կարող է լինելքեզ համար, քանի որ հակառակորդի գլխավոր մարզիչ Նիկոլայ Կոստովի հետ դու ծանոթ ես դեռեւս Հայաստանի առաջնությունում անցկացրած տարիներից: Ի՞նչ կասես նրա մասին:

– Կոստովը լավ մարզիչ է: Մեզ համար «Կարպատների» դեմ խաղը հեշտ չի լինելու անկախ նրանից՝ խաղում ես տանը, թե մրցակցի դաշտում: Կարծում եմ՝ այս անգամը բացառություն չի լինի: Բայց մենք դաշտ դուրս կգանք հաղթանակի համար ու կպայքարենք երեք միավորի համար: Միայն դա նշանակություն ունի մեզ համար:

-Ի՞նչ ես կարծում ինչպես«Կարպատներին» հաջողվեց բարելավել խաղը վերջին երեք հանդիպումներում:

– Մարզիչը փոփոխվեց եւ դա տվեց իր արդյունքը: Նորանշանակ Կոստովն այն մասնագետն է, ով կարող է հավաքել մի թիմ, որն ունակ է խաղալ բարձր մակարդակով: Դեռեւս այն ժամանակ, երբ Դոնեցկի «Մետալուրգը»-ը քիչ էր մնում դուրս մնար բարձրագույն խմբից, նրա ղեկավարությամբ հաղթեց վերջին 4 խաղերից 3-ում՝ մնալով բարձրագույն խմբում, իսկ արդեն մյուս մրցաշրջանում թիմը գրավեց չորրորդ տեղը:

-Կարծու՞մ ես, նա այն մարզիչներից է, ով կարող է ճգնաժամային իրավիճակում ինչ-որ բան փոխել, որկօգնի թիմին:

– Ոչ միայն ճգնաժամային իրավիճակներում: Կոստովն ունակ է արդյունքի հասնելու:

– «Շախտյոր»-«Կարպաստներ» խաղը լինելու է հանքափորների օրը: Դու արդեն հասցրե՞լ ես զգալ այդ տոնի կարևորությունը:

– Այո՚, իհարկե: Բայց ասեմ, որ «Դոնբաս Արենայում» բոլոր խաղերն էլ տոն են մեզ համար: