Մխիթարյանն ԱՊՀ երկրների հուլիս ամսվա լավագույն ֆուտբոլիստն է

ԵՐԵՎԱՆ, 15 ՕԳՈՍՏՈՍԻ, ԱՐՄԵՆՊՐԵՍ: Ռուսական «Սպորտք-Էքսպրես» պարբերականի «Աստղ» մրցույթի արդյունքներով` հետխորհրդային տարածքի հուլիս ամսվա լավագույն ֆուտբոլիստ է ճանաչվել Հայաստանի ազգային հավաքականի և Դոնեցկի «Շախտյոր»-ի կիսապաշտպան Հենրիխ Մխիթարյանը: Ինչպես հաղորդում է «Արմենպրես»-ը՝ Մխիթարյանին իրենց տարբերակում են ընդգրկել հարցմանը մասնակցած ԱՊՀ երկրների մարզական 15 լրագրողներից 12-ը, որոնցից 9-ը Մխիթարյանին նշել են առաջին տեղում, Ռուսաստանի ու Բելառուսի ներկայացուցիչները' երկրորդում, իսկ վրացի լրագրողը՝ 4-րդ տեղում: Հայ ֆուտբոլիստին իրենց տարբերակներում չեն նշել միայն Ադրբեջանի, Թուրքմենստանի ու Ուզբեկստանի ներկայացուցիչները:

Մխիթարյանին լավագույնն են ճանաչել նաև ռուսական թերթի ինտերնետ կայքի այցելուները:

Մխիթարյանը վաստակել է 60 միավոր, իսկ երկրորդ տեղը զբաղեցրած Ռուսաստանի հավաքականի և Սանկտ-Պետերբուրգի «Զենիթի» հարձակվող Ալեքսանդր Կերժակովը' 56 միավոր: 35 միավորով երրորդ հորիզոնականն է զբաղեցրել է զբաղեցրել Մախաչկալայի «Անժի»-ի պաշտպան Ռասիմ Թագիբեկովը:

Հեղինակավոր թերթի մեկնաբան Բորիս Լևինը գրել է. «Հիմնական պայքարն այս ամիս ընթացավ երկու ֆուտբոլիստների միջև: Ալեքսանդր Կերժակովն այնպիսի նվիրվածությամբ սկսեց ապացուցել, որ Եվրո-2012-ի բոլոր վիրպումները պարզապես անհեթեթություն էին, որ հուլիս ամսին աչքի ընկավ բոլոր խաղերում: Նա այնպիսի մարզավիճակում էր, որ օգոստոսի սկզբին ստացած վնասվածքի լուրը բոլորը ընդունեցին մեծ հիասթափությամբ:

Սակայն նույնիսկ Կերժակովի այդպիսի հիանալի խաղի պարագայում գտնվեց մեկը, ով շրջանցեց նրան. Դոնեցկի «Շախտյորի» առաջատար (այժմ դրա մասին կարելի է գրել առանց վերապահումների) Հենրիխ Մխիթարյանը: Հուլիս ամսին նա պարզապես անկասելի էր, իսկ օգոստոսին շարունակում է մեկը մյուսի հետևից գոլեր խփել: Այսպիսի ֆուտբոլիստ ունենալով' և' Հայաստանի հավաքականը, և' հանքափորները կարող են վստահ նայել դեպի ապագան: Եվ շատ հավանական է, որ «Աստղ» մրցանակը տարվա վերջում առաջին անգամ բաժին չհասնի ռուս կամ ուկրաինացի ֆուտբոլիստի»:

Մխիթարյանը լավագույնն էր ճանաչվել նաև մայիս ամսին: