1 րոպեի ընթերցում
ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ: Հայաստանի Հանրապետությունը Ահաբեկչության դեմ պայքարի ազգային ռազմավարություն է մշակելու: Ինչպես հաղորդում է «Արմենպրես»-ը, մարտի 2-ին լրագրողների հետ հանդիպման ժամանակ այս մասին տեղեկացրեց ՀՀ ազգային անվտանգության քարտուղար Արթուր Բաղդասարյանը:
«Ահաբեկչությունը մեծագույն սպառնալիք է ամբողջ աշխարհի համար. Հայաստանը եւս բացառություն չէ: Մեր երկրում ունենք վտանգավոր օբյեկտներ` Ատոմակայան, ռազմավարական նշանակության պետական կարեւոր կառույցներ, հետեւապես պետք է պատրաստ լինենք ցանկացած սցենարի»,- ասաց Բաղդասարյանը:
Միջազգային կառույցները Հայաստանին առաջարկել են ունենալ ահաբեկչության եւ կիբերահաբեկչության դեմ պայքարի ռազմավարություն:
ԱԱԽ քարտուղարի խոսքով` այն ենթադրելու է առկա բոլոր վտանգների վերլուծություն, ահաբեկչական հնարավոր գործողությունների ժամանակ անհրաժեշտ կանխարգելիչ միջոցառումների իրականացում եւ հակազդման գործիքների կիրառում:
ՀՀ կառավարությունն առաջիկա երեք ամիսների ընթացքում կմշակի գործողությունների ծրագիր, ժամանակացույց, կնախատեսվեն ֆինանսական միջոցներ: