Հայաստանի ըմբիշները պայքարում են Եվրոպայի առաջնությանը մասնակցելու համար

ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Հայաստանի ազատ ոճի ըմբշամարտի ազգային հավաքականի գլխավոր մարզիչ Արայիկ Բաղդատյանն ընտրել է այն մարզիկներին, ովքեր կպայքարեն տեղ զբաղեցնելու համար մարտի 6-11-ը Սերբիայի մայրաքաղաք Բելգրադում կայանալիք ըմբշամարտի Եվրոպայի առաջնությանը մեկնող ՀՀ ազատ ոճի ըմբշամարտի թիմում:

Այս մասին «Արմենպրես»-ին տեղեկացրին ՀՀ ըմբշամարտի ֆեդերացիայից:

Ազատ ոճի ըմբշամարտի Եվրոպայի առաջնությանը նախապատրաստվելու են 12 մարզիկներ՝ 55 կգ քաշայիններ Միհրան Ջաբուրյանը եւ Գեղամ Բաբախանյանը, 60 կգ Արթուր Առաքելյանը եւ Նարեկ Սանոյանը, 66 կգ Դավիթ Սաֆարյանը եւ Ժիրայր Հովհաննիսյանը, 74 կգ Մուսա Մուրթազալիեւը եւ Սուրեն Մարկոսյանը, 84 կգ Հաջիմուրադ Նուրմագոմեդովը եւ Գեւորգ Ավշարյանը, 96 կգ քաշային Անդրանիկ Գեւորգյանը եւ 120 կգ քաշային Ռուսլան Բասիեւը: