Կառավարությունը մերժեց հարյուրտոկոսանոց համամասնական ընտրակարգին անցնելու օրենսդրական նախաձեռնությունը
1 րոպեի ընթերցում
ԵՐԵՎԱՆ, 9 ՓԵՏՐՎԱՐԻ, ԱՐՄԵՆՊՐԵՍ: ՀՀ կառավարությունը մերժեց մի շարք պատգամավորների՝ Ազգային ժողովի ընտրությունները 100 տոկոս համամասնական ընտրակարգով անցկացնելու օրենսդրական նախաձեռնությունը: Ինչպես հաղորդում է «Արմենպրես »-ը՝ Կառավարության` փետրվարի 9-ի նիստում ՀՀ արդարադատության փոխնախարար Գրիգոր Մուրադյանը նշեց, որ տարբեր երկրներում ընտրակարգի այս կամ այն ձևի առկայությունը պայմանավորված է բազմաթիվ հանգամանքներով: «Որևէ համակարգի միանշանակ ընտրությունն ինքնին կապ չունի ընտրական գործընթացի արդյունավետության հետ: ՀՀ-ում՝ որպես կիսանախագահական կառավարման ձև ունեցող պետություն, համամասնականին զուգահեռ մեծամասնական ընտրակարգի առկայությունը այն երաշխիքն է, որն ապահովում է բնակչության որոշակի հատվածի շահերը ներկայացնելու հնարավորություն»,- ասաց Մուրադյանը: