2 րոպեի ընթերցում
ԵՐԵՎԱՆ, 14 ԴԵԿՏԵՄԲԵՐԻ, ԱՐՄԵՆՊՐԵՍ: Ամանորին սպասում են բոլորը` անկախ տարիքից, սեռից, զբաղեցրած դիրքից: Նոր օրվա հետ են մարդիկ կապում իրենց ցանկությունների ու երազանքների իրականցումը: «Արմենպրես»-ը փորձեց ճշտել, թե այդ տոնից ինչ սպասելիքներ ունեն Հայաստանի Հանրապետության գործադիր իշխանության ներկայացուցիչները: Ամանորյա հրաշքից իր ակնկալիքն է ներկայացում ՀՀ փոխվարչապետ, տարածքային կառավարման նախարար Արմեն Գեւորգյանը:
-Պարո’ն Գեւորգյան, Ամանորն ունի յուրահատուկ խորհուրդ: Այդ օրը մարդիկ սկսում են երազանքներ պահել, հավատալ հրաշքներին: Իսկ Դուք հավատու՞մ եք արդյոք ամանորյա հրաշքին:
-Այո’, երազանքներ պահում եւ հավատում եմ, որ դրանք անպայման կիրականանան:
-Կա՞ արդյոք մի երազանք, ցանկություն, որը պահում եք յուրաքանչյուր Ամանորին, սակայն այն դեռեւս չի իրականացել:
-Բոլոր երազանքներն իրականանում են, հակառակ դեպքում իմաստ չէր ունենա պահել:
-Նվերներ ստանալ սիրում են բոլորը: Լինում են նաեւ նվերներ, որոնք հիշվում են ամբողջ կյանքի ընթացքում: Ո՞րը Դուք կմտաբերեք:
-Դժվար է մտաբերել, հիմնականում ինչ ստացել եմ` օգտակար են, սակայն կան նվերներ, որոնք առավել մեծ հաճույք են պատճառում. երբ երեխաներս են փորձում իրենց ձեռքով պատրաստածը նվիրել:
-Թեեւ տոնակատարությունները միշտ բերում են խինդ եւ ուրախություն, այնուամենայնիվ, հաճախ այդ օրերն ուղեկցվում են մի շարք հաճելի «հոգսերով», որոնց շարքին են դասվում նաեւ ամանորյա գնումները: Դա Ձեզ համար հո՞գս է, թե հաճույք:
-Իհարկե, մեծ հաճույք է: Ընդ որում` սիրում եմ ամանորյա նախապատրաստություններին անմիջական մասնակցություն ունենալ, բացի ուտեստների պատրաստումից:
-Ի՞նչ կմաղթեք այս տարի հայ ժողովրդին:
-Բոլորին առողջություն, բարեկեցություն, ընտանեկան ջերմություն եւ երջանկություն:
Հարցազրույցը` Արուսիկ Զախարյանի