Մեկնարկում է ՀՀ Նախագահի այցը Իտալիա
3 րոպեի ընթերցում
![Մեկնարկում է ՀՀ Նախագահի այցը Իտալիա](http://armenpress.am/resized/480/static/news/b/2011/12/671818.jpg)
ԵՐԵՎԱՆ, 12 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ Նախագահ Սերժ Սարգսյանի աշխատանքային այցը Իտալիայի Հանրապետություն եւ Վատիկան կմեկնարկի դեկտեմբերի 12-ին: Ինչպես հաղորդում է «Արմենպրես»-ը, այցի շրջանակներում նախատեսված են Հանրապետության ղեկավարի հանդիպումները Հռոմի պապ Բենեդիկտոս XVI-ի, Իտալիայի նախագահ Ջորջիո Նապոլիտանոյի, Խորհրդարանի պատգամավորների պալատի նախագահ Ջանֆրանկո Ֆինիի, Վատիկանի պետքարտուղար Կարդինալ Տարչիցիո Բերտոնեի, Հռոմի քաղաքապետ Ջանի Ալեմանոյի հետ:
Հռոմում Նախագահ Սերժ Սարգսյանը կայցելի նաեւ Բրասկի թանգարանում բացված «Դվին. Հայաստանի մայրաքաղաքը Եվրոպայի եւ Ասիայի միջեւ» խորագրով ցուցահանդես:
Վենետիկում ՀՀ Նախագահը կմասնակցի երկու երկրների նախագահների բարձր հովանու ներքո բացվող «Հայաստան. Քաղաքակրթության դրոշմներ» ցուցահանդեսին, որը նվիրված է հայ գրատպության 500-ամյակին:
Սերժ Սարգսյանը Վենետիկում հանդիպում կունենա Մխիթարյան միաբանության անդամների եւ Իտալիայի հայ համայնքի ավելի քան երկու տասնյակ կազմակերպությունների ներկայացուցիչների հետ: Նախատեսված է նաեւ Հանրապետության ղեկավարի հանդիպումը «Հայաստան. Քաղաքակրթության դրոշմներ» ցուցահանդեսի բացման առիթով աշխարհի տարբեր երկրներից Իտալիա ժամանած հայագետների հետ:
Սերժ Սարգսյանը կայցելի նաեւ Վենետիկի քաղաքապետարան, որտեղ ներկա կգտնվի Երեւանը եւ Վենետիկը քույր քաղաքներ հռչակելու գործընթացը սկսելու վերաբերյալ երկու քաղաքների միջեւ համաձայնագրի ստորագրման արարողությանը:
Այցի շրջանակներում Նախագահը հանդիպում կունենա նաև Իտալիայի գործարար համայնքի ներկայացուցիչների հետ:
Հայաստանի Հանրապետության եւ Իտալիայի Հանրապետության միջեւ դիվանագիտական հարաբերությունները հաստատվել են 1992թ-ի մարտի 17-ին:
1995թ-ի մարտին բացվեց Իտալիայում ՀՀ դեսպանությունը, իսկ 2000թ-ի սեպտեմբերին Երեւանում բացվեց ՀՀ-ում Իտալիայի դեսպանությունը: 1999 եւ 2005 թվականներին Իտալիա այցելել է ՀՀ երկրորդ նախագահ Ռոբերտ Քոչարյանը: Հայաստանի եւ Իտալիայի միջեւ կան ստորագրված շուրջ երկու տասնյակ արձանագրություններ, համաձայնագրեր, հուշագրեր եւ հայտարարություններ:
Երկու երկրների միջեւ առեւտրաշրջանառությունը կազմում է շուրջ 130 մլն ԱՄՆ դոլար: