Երեւան-Մեղրի ճանապարհին կահույքով բեռնավորված իրանական կոնտեյներ է շրջվել

ԳՈՐԻՍ, 12 ԴԵԿՏԵՄԲԵՐԻ, ԱՐՄԵՆՊՐԵՍ: Շարունակում է միակողմանի փակ մնալ Երեւան-Մեղրի միջպետական ճանապարհի Գորիս-Կապան ճանապարհահատվածի 20-րդ կմ-ի հատվածը, որտեղ դեկտեմբերի 11-ին' ժամը 18:52-ին, շրջվել էր կահույքով բեռնավորված Իրանի Իսլամական Հանրապետությանը պատկանող «ՄԱԿ» մակնիշի THR 62598 պետհամարնիշով բեռնատարի կոնտեյները' բեռնարկղը:

Գորիսի «Ոսմար» ճանշին ձեռնարկության ճարտարագետ Ներսես Ասրյանն «Արմենպրես»-ի' Սյունիքի թղթակցին տեղեկացրել է, որ չնայած միակողմանի երթեւեկությանը' ճանապարհի այս հատվածում մեքենաների կուտակումներ չկան: Մինչեւ կեսօր ճանապարհահատվածի երկկողմանի երթեւեկությունը կվերականգնվի, ինչի համար անհրաժեշտ է ավտոկռունկի օգնությամբ կոնտեյները տեղադրել բեռնատարի վրա: Ասրյանը տեղեկացրեց նաեւ, որ իրենց կողմից սպասարկվող մայրուղու Սիսիան-Կապան ճանապարհը բաց է եւ երթեւեկելի, սակայն Սիսիան-Գորիս, Գորիս-Շուռնուխ հատվածներում մերկասառույց է:

Այս ճանապարհահատվածները մշակված են աղով եւ ավազով: Մայրուղու Սյունիքի տարածքով անցնող մյուս ճանապարհահատվածները եւս երթեւեկելի են: