3 րոպեի ընթերցում
ԵՐԵՎԱՆ, 17 ՆՈՅԵՄԲԵՐԻ, ԱՐՄԵՆՊՐԵՍ: Ներկայում կարեւորագույն խնդիրը կովկասյան տարածաշրջանի համար կայունությունն է եւ նրա օրենսդրական ապահովումը: Նոյեմբերի 17-ին լրագրողների հետ ճեպազրույցում նման տեսակետ հայտնեց Վաթսոնի հետազոտությունների ինստիտուտի միջազգային հարաբերությունների ֆակուլտետի դասախոս, դոկտոր, պրոֆեսոր Ջեյմս Դեր Դերյանը, ով Երեւանում է' մասնակցելու «Տարածաշրջանային անվտանգության դինամիկան Հարավային Կովկասում» թեմայով գիտաժողովին: Դեր Դերյանը նշեց, որ իր երկիրը' ԱՄՆ-ն, անում է լուրջ քայլեր այս խնդրի լուծման ուղղությամբ: Սահմանների բացումը եւ քաղաքացիական հասարակության ընդլայնումը, ինչպես նաեւ Հիլարի Քլինթոնի այցելությունը տարածաշրջան, ԱՄՆ ջանքերի լավագույն դրսեւորումներից են: Պրոֆեսորի խոսքով' Մարդու իրավունքները, ինչպես նաեւ յուրաքանչյուր պետության գերակայությունը պետք է հարգվեն եւ պաշտպանվեն:
«Ցանկացած տարածաշրջանի անվտանգության մեջ, ըստ իս, կարեւոր է, թե ինչ հետաքրքրություններ են կիսում այնտեղ: Մինչ այժմ այդ շահերը, հետաքրքրությունները կախված են բնական ռեսուրսներից: Հայաստանի մեծագույն արժեքը մարդիկ են' հայերը: Մարդկային կապիտալը կարեւորագույն ռեսուրս է»,-նշեց Դեր Դերյանը: Ղարաբաղյան հարցին անդրադառնալով' պրոֆեսորն ասաց, որ սա իր առաջին այցելությունն է Հայաստան. մի քանի օր է' այստեղ է, սակայն մեծ ցանկություն ունի վերադառնալու, որպեսզի լավագույնս հասկանա խնդիրը: Ամեն դեպքում, նա համոզված է' լավագույնը դիվանագիտական լուծումներն են:
«Տարածաշրջանային անվտանգության դինամիկան Հարավային Կովկասում» թեմայով երկօրյա գիտաժողովը կազմակերպվել է քաղաքական գիտությունների ակադեմիական գիտահետազոտական հիմնադրամի, ՀՀ ՊՆ Դ. Կանայանի անվան ազգային ռազմավարական հետազոտությունների ինստիտուտի եւ Եվրասիա համագործակցություն հիմնադրամի կողմից: Գիտաժողովին մասնակցում են անվտանգության բնագավառի փորձագետներ ԱՄՆ-ից, Թուրքիայից, Իսրայելից, Կանադայից, Հայաստանից, Մեծ Բրիտանիայից, Ռումինիայից եւ Ռուսաստանի Դաշնությունից:
Հայաստանի Հանրապետության պաշտպանության նախարարի խորհրդական Հայկ Քոթանջյանը ընթերցեց ՀՀ նախագահի ողջույնի խոսքն' ուղղված գիտաժողովի մասնակիցներին: Երկրի ղեկավարի ուղերձում անդրադարձ է կատարվել տարածաշրջանային մարտահրավերներին, սպառնալիքների համալիրին, որոնք ստիպում են Հայաստանին սպասվելիք հնարավոր պատերազմական գործողությունների հանդեպ լինել պատրաստ, կազմակերպված դիրքերում եւ հակառակորդին զսպող քաղաքական, ռազմական եւ տեխնիկական մշակումներ իրականացնել:
Գիտաժողովի քննարկումների օրակարգում ներառված են ոչ միայն Կովկասին, այլ նաեւ հարակից երկրներին եւ տարածաշրջանային աշխարհաքաղաքական դերակատարներին վերաբերող թեմաներ: Իրանի միջուկային ծրագրերի շուրջ առաջացած խնդրի շրջանակներում նշվեց, որ Ռուսաստանը եւ ԱՄՆ-ն պետք է միավորեն իրենց ուժերը, որպեսզի հնարավոր լինի լուծման դրական արդյունքներ ակնկալել: