2 րոպեի ընթերցում
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: «Ղարաբաղյան հիմնախնդրի վրա մենք շուտով կզգանք գլոբալ գործընթացների հետքն ու ազդեցությունը»,-այսօր լրագրողների հետ հանդիպմանը նշեց քաղաքագետ Ալեքսանդր Մանասյանը: Նա նկատեց,որ Մինսկի խմբի համանախագահների' տարածաշրջան կատարած վերջին այցելության ընթացքում ընդունած փաստաթուղթն արտաքուստ կարծես չի տարբերվում նախորդներից, սակայն այստեղ նոր շեշտադրումներ կան' կապված ոչ միայն տարածաշրջանային, այլեւ գլոբալ զարգացումների հետ: Քաղաքագետը մանրամասնեց' տարածաշրջանից դուրս տեղի ունեցող գործընթացներ ասելով' նկատի ունի առաջին հերթին' Թուրքիայի նոր արտաքին քաղաքական ռազմավարությունը: Թուրքիան, ըստ բանախոսի, վերադառնում է օսմանիզմի քաղաքականությանը. նեոօսմանիզմը դառնում է Թուրքիայի գործնական քաղաքականության գլխավոր վեկտորը:
«Վերլուծաբանի աչքով նայելով'Մինսկի խմբի համանախագահների վերջին հայտարարության մեջ առաջին պլան կմղեի' ինչպես են կարեւորում փոխադարձ վստահության մթնոլորտի ձեւավորման հարցը. դա առաջին հերթին նրանք կապում են Ադրբեջանի դիրքորոշումների փոփոխության հետ, որովհետեւ անվստահության աղբյուրը գտնվում է Բաքվում»,-ասաց Ա. Մանասյանը' նշելով, որ առանց վստահության ձեւավորման' առաջընթաց հնարավոր չէ: Նրա խոսքով' ակնհայտ է, որ համանախագահները, լինելով Երեւանում, Ստեփանակերտում, Բաքվում, «սառը ջուր են լցնում» Ադրբեջանի' բանակցություններին երկկողմ բնույթ տալու նկրտումների վրա:
«Լեռնային Ղարաբաղը դուրս է մնացել բանակցային գործընթացից». սա, ըստ բանախոսի, սխալ ձեւակերպում է, որն ինչ-որ մեկի «թեթեւ ձեռքով» դրվել է շրջանառության մեջ եւ լայն գործածություն ստացել: Լեռնային Ղարաբաղն այս գործընթացից ամենեւին էլ դուրս չէ: