Ըստ Ն.Զոհրաբյանի` Արեւելյան գործընկերությունը նախադրյալներ է ստեղծում Հարավային Կովկասում կայունության հաստատման համար
1 րոպեի ընթերցում
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Արեւելյան գործընկերության նպատակները նախադրյալներ են ստեղծում Հարավային Կովկասի տարածաշրջանում կայունության հաստատման համար: Այսօր ելույթ ունենալով Միջազգային եվրոպական շարժման երեւանյան կոնգրեսի ընթացքում' այս մասին հայտարարեց ԱԺ եվրաինտեգրման հարցերով մշտական հանձնաժողովի նախագահ Նաիրա Զոհրաբյանը' ընդգծելով, որ Հայաստանը միշտ էլ կողմ է եղել կառուցողական համագործակցությանը' բաժանարար գծերից խուսափելու համար:
Նա շեշտեց, որ Արեւելյան գործընկերության հիմնական նպատակներից է քաղաքական ասոցացումը եւ տնտեսական ինտեգրումը ԵՄ-ի հետ, ուստի խիստ կարեւորվում է ԵՄ-ի որդեգրած «ավելին ավելիի դիմաց» կարգախոսը, այսինքն' գնահատականներ' համարժեք արժանիքներին:
Ն.Զոհրաբյանը շեշտեց, որ Հայաստանն առաջինն է կազմավորել իր քաղաքացիական պլատֆորմը, առանց որի բավական դժվար կլիներ առաջ մղել գործընկերության հիմնական ծրագրերը Հայաստանում: Պատգամավորի խոսքով' Եվրանեսթում հայկական պատվիրակության եւ քաղաքացիական պլատֆորմի համագործակցության արդյունքում խորհրդարանական այդ վեհաժողովում ներկայում քննարկվում են երկու զեկույցներ: