368.54
Ա. Մելիքյան. «Հայաստանը եւ Թուրքիան պատրաստ չէին արձանագրություններին»
1 րոպեի ընթերցում
ԵՐԵՎԱՆ, 13 ՀՈԿՏԵՄԲԵՐԻ, ԱՐՄԵՆՊՐԵՍ: Հայ-թուրքական արձանագրությունների վավերացման գործում հետաքրքրված էին երկու տարբեր ճամբարներ' ԱՄՆ-ն եւ Ռուսաստանը, սակայն վերջինս հավանության չարժանացրեց հայ-թուրքական մերձեցման տվյալ մոդելը, եւ գործընթացը սառեցված է: Այսօր լրագրողների հետ հանդիպման ժամանակ այս մասին նշեց ԼՂՀ նախկին արտգործնախարար Արման Մելիքյանը' հավելելով, որ կարելի է պնդել' Ռուսաստանի մտադրությունն իրագործվել է, եւ նման մոտեցմամբ հարաբերությունների հաստատումը' սառեցվել:
«Գործընթացը սկսվեց առանց նախաբանի: Կողմերը պատրաստ չէին դրան: Արդյունքն էլ այն եղավ, որ արագացված տեմպերով արձանագրությունների վավերացում չստացվեց, եւ կողմերը մնացին նախկին դիրքերում: Իր հերթին, Ռուսաստանը, ով Հայաստանի միջոցով տարածաշրջանում ներկայացնում է իր շահերը, ազդեց գործընթացի վրա»,- ասաց Ա. Մելիքյանը: Վերջինիս կարծիքով' հետագա զարգացումները ապացուցեցին, որ չնայած այդ մերձեցման նախագիծը հեղինակվել էր ԱՄՆ-ի կողմից, սակայն այժմ կողմերը ավելի շատ ցանկանում են գործընթացում տեսնել Ռուսաստանին:
Բաժանորդագրվեք մեր ալիքին Telegram-ում