1 րոպեի ընթերցում
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ:Նկարիչ Ժյուլ Բաստիեն Լըպաժի' աշխարհահռչակ քանդակագործ Օգուստ Ռոդենի հեղինակած արձանը բարեկամության խորհրդանիշ է Հայաստանի ու Ֆրանսիայի միջեւ: Ինչպես այսօր Երեւանի Ֆրանսիայի հրապարակում ՀՀ նախագահ Սերժ Սարգսյանի հետ արձանի հանդիսավոր բացմանն ասաց Ֆրանսիայի նախագահ Նիկոլա Սարկոզին, Ռոդենի արձանը Ֆրանսիայի անունը կրող հրապարակին կհաղորդի իր վերջնական դիմագիծը: Նա հիշեցրեց, որ աշխարհահռչակ քանդակագործը սերտ կապեր ուներ Հայաստանի հետ:
Ն. Սարկոզին ուրախություն հայտնեց Հայաստանի 20-ամյա անկախությունից ընդամենը մի քանի օր անց մեր երկրում ներկա գտնվելու համար:
Ըստ նրա' Ռոդենը պատկանում էր այն մտավորականների շարքին, ովքեր դատապարտեցին զանգվածային ջարդերը' նախանշաններն այն ողբերգության, որը պիտի վիճակվեր նաեւ հայ ժողովրդին: «Ի սկզբանե Հայաստանը ֆրանսիացիների սրտում է: Մեր երկու երկրները նման են իրար ազգային դիմագծով: Ֆրանսիան, ինչպես Հայաստանը, հարուստ է հազարամյակների պատմությամբ ու կապված է իր մշակույթին: Դժվարությունների մեջ է, որ երկու ժողովուրդները կերտել են իրենց դիմագծերը»,- նշեց Ն. Սարկոզին' հավելով, որ Հայստանի ու Ֆրանսիայի արմատները գնում են պատմության խորքերը: