Ռ. Սաֆրաստյան. «ԼՂ խնդրի կարգավորման գործում առաջընթաց չի կարելի ակնկալել մինչեւ 2012 թվականի կեսերը»
1 րոպեի ընթերցում
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: Ղարաբաղյան հիմնահարցի կարգավորման շահագրգիռ կողմերը «թայմ-աութ» են վերցրել, որը պայմանավորված է նախընտրական տրամադրություններով: Այս մասին այսօր լրագրողների հետ հանդիպման ժամանակ նշեց ՀՀ ԳԱԱ Արեւելագիտության ինտիտուտի տնօրեն Ռուբեն Սաֆրաստյանը' ընդգծելով, որ անգամ Ռուսաստանը, որն ամենաակտիվն է ներքաշված կարգավորման գործընթացում, նույնպես տրամադրված է նախընտրական աժիոտաժին:
«Հայաստանում, Ադրբեջանում սա նախընտրական տարի է, եւ կողմերը փոքր-ինչ փորձում են «թայմ-աութ» վերցնել: Ռուսաստանը նույնպես, իր հերթին, գործընթացին թափ չի տալիս' հաշվի առնելով իր ներքին քաղաքական զարգացումները»,- նշեց Ռ. Սաֆրաստյանը' ընդգծելով, որ միջազգային հանրությունն էլ իր ուշադրության կենտրոնում է պահում արեւելյան այլ պետություններում զարգացումները, որոնք ավելի առաջնային են այս պահին, քան Ղարաբաղյան հիմնահարցի կարգավորումը:
«Հաշվի առնելով ստեղծված պայմանները' ամենայն հավանականությամբ, մինչեւ 2012 թվականի կեսերն անհնար է ակնկալել որեւէ էական առաջխաղացում ու փոփոխություն ԼՂ խնդրի կարգավորման գործում»,- ասաց արեւելագետը: