368.54
Ս. Մինասյան. «Վարշավայի հռչակագրի ընդունումը կնշանակի ԵՄ հետ համագործակցության նոր շրջան»
2 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Վարշավայի հռչակագրի ընդունումը կնշանակի Եվրամիության հետ Հայաստանի համագործակցության նոր շրջան: Այս կարծիքն այսօր լրագրողների հետ հանդիպմանն արտահայտեց «Կովկաս» ինստիտուտի փոխտնօրեն, քաղաքագետ Սերգեյ Մինասյանը' հավելելով, որ հռչակագրի ընդունումը կնշանակի առնվազն նոր ֆինանսական աջակցություն Հայաստանին, նոր քաղաքականություն' կապված անցագրային ռեժիմի հետ:
Ըստ քաղաքագետի' մեծ նշանակություն ունեն այն դրույթները, որոնք ուղղակի կամ անուղղակի վերաբերում են տարածաշրջանային հակամարտություններին, մեզ համար չափազանց կարեւոր է այն դրույթը, որում նշվում է' բանակցային գործընթացը եւ կարգավորումը պիտի տեղի ունենան արդեն գոյություն ունեցող ձեւաչափերի շրջանակներում: Քաղաքագետի խոսքով' ԵԱՀԿ Մինսկի խմբի համանախագահներն ավելի ուշադիր են նոր ռազմական գործողություններ չվերսկսելու խնդրին: «Վերջին շրջանում լարվածությունը բավական թուլացել է, պատճառն այն է, որ Բաքուն հասկացել է' ստատուս-քվոյի փոփոխման բոլոր լծակները գրեթե սպառվել են, գոյություն ունի ե'ւ ռազմատեխնիկական, ե'ւ ռազմաքաղաքական բալանս, որոնց ականատեսը դարձանք սեպտեմբերին 21-ի շքերթի ժամանակ»,-ասաց բանախոսը' նշելով, որ որոշ պետություններ, ամենաակնառուն Ռուսաստանի Դաշնությունն էր, ցույց տվեցին, որ դեմ են ռազմական գործողությունների վերսկսմանը:
Բաժանորդագրվեք մեր ալիքին Telegram-ում