Կ. Աճեմյան. «Ողջ միջազգային հանրությունը հասկանում եւ ընդունում է ԼՂ խնդրի կարգավորման բուն էությունը»
1 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանից եւ Թուրքիայից բացի, ողջ միջազգային հանրությունը հասկանում եւ ընդունում է ղարաբաղյան հարցի կարգավորման բուն էությունը: Ինչպես այսօր լրագրողների հետ հանդիպմանն ասաց ՀՀԿ անդամ Կարինե Աճեմյանը, պարբերաբար հարեւան երկիրը' Ադրբեջանը, քննադատում է Մինսկի խմբի աշխատանքները:
«Խմբի առաքելությունը մենք արժեւորում ենք, ու գտնում ենք, որ կարեւորագույն ճանապարհը բանակցային գործընթացն է եւ Մինսկի խմբի աշխատանքները»,-ասաց նա: Բանախոսը նաեւ անդրադարձավ Ադրբեջանի արտաքին գործերի նախարարության վերջին հայտարարությանը, որում ասված է' իբր բանակցային գործընթացը լճացում է ապրում: Հղում տալով ՀՀ նախագահ Ս. Սարգսյանի' ՄԱԿ-ի Գլխավոր ասամբլեայում ունեցած ելույթին' Կ. Աճեմյանը նշեց, որ Կազանում գործընթացը կանգնեցվեց, ձախողման փորձ արվեց հենց Ադրբեջանի կողմից, քանի որ նրանք նոր փոփոխություններ առաջարկեցին: «Դրանց մենք, իհարկե, համաձայն չենք, եւ մեր դիրքորոշումը հստակ է այս հարցում»,-նշեց բանախոսը: