368.54
Ն. Տեր-Գրիգորյանց. «Հայության միասնականությունն ապահովելու համար պետք է ձեռնարկվեն բոլոր հնարավոր քայլերը»
2 րոպեի ընթերցում
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Սփյուռքի կազմակերպությունների ղեկավարների եւ ներկայացուցիչների համահայկական համաժողովն աննախադեպ իրադարձություն էր, այն ծառայեց իր նպատակին: Այս մասին «Արմենպրես»-ի հետ զրույցում նշեց Հայաստանի զինված ուժերի ստեղծման գործում նշանակալի ավանդ ունեցած գեներալ-լեյտենանտ Նորատ Տեր-Գրիգորյանցը, ով Ռուսաստանից Հայաստան է ժամանել համաժողովին մասնակցելու նպատակով: Նրա խոսքով' համաժողովը հնարավորություն տվեց Սփյուռքի հայկական համայնքների կազմակերպությունների ղեկավարներին, ներկայացուցիչներին միմյանց հետ անմիջական շփվել, կապեր հաստատել:
«Սա շատ կարեւոր նախաձեռնություն է: Ավելին, այն ինչ-որ առումով նաեւ ռազմավարական նշանակություն ունի: Համաժողովում վերհանվեցին հայ ազգի համար կարեւոր նշանակության խնդիրներ, ինչպես նաեւ Սփյուռքին առնչվող հարցեր»,-ասաց Ն. Տեր-Գրիգորյանցը'կարեւորելով Սփյուռքում լեզվի եւ մշակույթի պահպանման կոչը: Նրա խոսքով' դրանք պետք է ամուր հիմքերի վրա դնել, որովհետեւ հանդիսանում են Սփյուռքի հայերի միասնականության օղակներից մեկը:
Ն. Տեր-Գրիգորյանը կարեւորեց հայկական իրականության մեջ Սփյուռքի նախարարության առկայությունը, որը ստեղծվեց ՀՀ նախագահ Սերժ Սարգսյանի նախաձեռնությամբ: Նրա խոսքով' նախարար Հրանուշ Հակոբյանն ամեն ինչ անում է աշխարհի ցանկացած վայրում Սփյուռքի գաղթօջախների հետ կապ հաստատելու համար:
«Նկատվում է, որ փոխգործակցություն կա, սակայն դեռ շատ հարցերում արդյունքները տեսանելի չեն: Դա, իհարկե, կապված է այն հանգամանքի հետ, որ նախարարությունը բավական երիտասարդ է»,-ասաց Ն. Տեր-Գրիգորյանցը: Նա նշեց, որ բոլոր հնարավոր քայլերը պետք է ձեռնարկվեն հայության միասնականությունն ապահովելու համար:
Բաժանորդագրվեք մեր ալիքին Telegram-ում