2 րոպեի ընթերցում
ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ:«Wikileaks» սկանդալային կայքի հրապարակումները ոչ միշտ է, որ համապատասխանում են իրականությանը: Ինչպես այսօր լրագրողների հետ հանդիպման ժամանակ ասաց ԱԺ Հանրապետական խմբակցության ղեկավար Գալուստ Սահակյանը, ավելի լավ է հավատալ հասարակության ու լրատվամիջոցների ստահոդ լուրերին, քան «Wikileaks»-ի հրապարակումներին: Ըստ նրա' այդ սկանդալային կայքէջը ոչ վիշապ է, ոչ էլ հրեշտակ, եւ հասարակությունը տարբեր կերպ է ընկալում դրանում զետեղված ինֆորմացիան: «Երբ ՀՀ իշխանություններին վերաբերող լուրերը դրական են, ոչ ոք չի խոսում այդ մասին, հակառակ դեպքում' մեծ աղմուկ է բարձրանում»,- նշեց բանախոսը:
Անդրադառնալով նույն կայքէջի' ՀՀ նախագահ Սերժ Սարգսյանի եւ նախկին նախագահ Ռոբերտ Քոչարյանի վերաբերյալ հրապարակմանը' Գ. Սահակյանն ասաց.
«Սերժ Սարգսյանն ու Ռոբերտ Քոչարյանը մարդիկ են, ովքեր միասին պատերազմի ճանապարհ են անցել: Նրանց միջեւ որեւէ հակասություն չի կարող լինել' հնարավոր են միայն կարծիքներ»:
Գ. Սահակյանի խոսքով' մարտի 1-ի դեպքերի վերաբերյալ հարցերը պետք է ուղղել Լեւոն Տեր-Պետրոսյանին, «ով հասարակությանը տարավ իր հետեւից»: Ըստ նրա' պատասխանատվությունն իշխանությանն է, բայց մեղավորներին պետք է փնտրել ընդդիմության ճամբարում:
ՀՀԿ խմբակցության ղեկավարը, անդրադառնալով Հայ ազգային կոնգրեսի առաջիկա հանրահավաքին, նշեց. «Ընդդիմությունն իբրեւ թե այնքան ժողովրդավար է դարձել, որ պիտի ժողովրդից հարցնի' երկխոսի՞ իշխանությունների հետ, թե՞ ոչ: Նախընտրական շրջան է, դրա միջոցով ժողովրդի ուշադրությունն են գրավում»: