1 րոպեի ընթերցում
ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: Երկխոսությունը ծանր է ընթանում, սակայն երկու կողմից էլ կառուցողական ոգին պահպանվում է: Այսօր լրագրողների հետ հանդիպման ժամանակ, անդրադառնալով իշխող կոալիցիայի եւ Հայ ազգային կոնգրեսի միջեւ ընթացող երկխոսությանը, նման տեսակետ հայտնեց Ազգային ժողովի ՀՀԿ խմբակցության պատգամավոր, երկխոսության աշխատանքային խմբի անդամ Գագիկ Մինասյանը:
Նրա կարծիքով' քննարկումները երկար եւ ծանր են տեւում, քանի որ Հայաստանն ունի բազմաթիվ խնդիրներ, որոնց լավագույն լուծում տալու համար պետք է բոլոր քաղաքական ուժերը համախմբեն իրենց կարողությունները:
Անդրադառնալով այն հայտարարություններին, թե օգոստոսի 9-ին ՀԱԿ ակտիվիստների եւ ոստիկանների միջեւ տեղի ունեցած միջադեպի հետեւանքով ՀԱԿ-ը կարող է դուրս գալ երկխոսությունից, Գ.Մինասյանը համոզմունք հայտնեց, որ ՀԱԿ-ն այդպես չի վարվի, քանի որ չունի դրա համար բավարար հիմքեր:
Գ.Մինասյանը զերծ մնաց միջադեպի վերաբերյալ կարծիք հայտնելուց, քանի որ նման պայմանավորվածություն էր ձեռք բերվել երկխոսության վերջին փուլում:
«Ես կարծում եմ, որ իրավական գործընթացի մասին կարծիք հայտնելը ճիշտ չէ: Միայն այդ գործընթացի ավարտից հետո հնարավոր կլինի պատկերը վերականգնել ամբողջությամբ»,- ասաց պատգամավորը։